अफगान नागरिकलाई निर्वासन गर्ने अमेरिकी तयारीप्रति तालिबानको चिन्ता

अमेरिकाले अफगान नागरिकलाई पाकिस्तान हुँदै अफगानिस्तान फर्काउने तयारी गरेको खबरप्रति तालिबान सरकारले गम्भीर चिन्ता जनाएको छ। अफगान विदेश मन्त्रालयका प्रवक्ता अब्दुल कहार बाल्खीले सोमबार विज्ञप्ति निकालेर यो चिन्ता व्यक्त गर्नुभएको छ। अमेरिकी सञ्चारमाध्यम र आप्रवासी अधिकारकर्मी समूहका अनुसार अमेरिकामा रहेका १५० भन्दा बढी अफगानलाई यसरी पठाउने योजना छ।

सूचीमा सन् २०२१ मा अमेरिकी सेना फिर्ता हुनुअघि उसलाई सघाएका व्यक्तिका आफन्तसमेत रहेको बताइएको छ। अधिकारकर्मीहरूले पूर्वसहयोगी र तिनका परिवारलाई जबरजस्ती फर्काउँदा उनीहरूको सुरक्षा जोखिममा पर्न सक्ने चेतावनी दिएका छन्। पाकिस्तानले भिसाविनाका अफगानलाई पक्राउ गर्न आदेश दिएपछि दुई छिमेकीबीचको सम्बन्धमा तनाव बढ्दै गएको छ।