माग पूरा भए दुई दिनमै होर्मुज खोल्न सकिने इरानको भनाइ, चीनको समर्थन; तेलको मूल्य घट्यो

अमेरिकाले आफ्ना माग पूरा गरेमा दुई दिनभित्रै होर्मुज जलमार्ग फेरि खोल्न सकिने इरानले जनाएको छ। इरानी विदेश मन्त्रालयका प्रवक्ता इस्माइल बाघाईले सोमबार तेहरानमा भएको साप्ताहिक पत्रकार सम्मेलनमा यस्तो बताउनुभएको हो। उहाँका अनुसार मध्यस्थकर्तामार्फत हुने कुनै पनि अप्रत्यक्ष वार्ताको आधार इरानले गत सेप्टेम्बरमा अघि सारेको सातदिने योजना हुनेछ।

सद्भावस्वरूप त्यो अवधि घटाएर दुई दिन बनाइएको उहाँले उल्लेख गर्नुभएको छ। इरानी समाचार संस्था आईआरएनएका अनुसार विदेशमन्त्री अब्बास अराघचीले कतारको दोहामा वार्ता जारी रहे पनि अन्तिम सहमति नभएको बताउनुभएको छ। इरानले प्रतिबन्ध हटाउन, क्षेत्रमा अमेरिकी सैन्य उपस्थिति घटाउन, तेल निर्यातसम्बन्धी छुट फेरि दिन र रोक्का रकम फुकुवा गर्न माग राखेको छ।

यता चीनका विदेशमन्त्री वाङ यीले बेइजिङमा इरानको सर्वोच्च राष्ट्रिय सुरक्षा परिषद्का अधिकारी अली बाघेरी कानीसँग भेटेर इरानको सार्वभौमिकता र सुरक्षाप्रति समर्थन जनाउनुभएको छ। राष्ट्रपति सी जिनपिङले ओमानका सुल्तान हैथम बिन तारिक अल सईदसँगको भेटमा मध्यपूर्वलाई ठूला शक्तिको होडबाजीको थलो बनाउन नहुने बताउनुभएको छ। रोयटर्सका अनुसार वार्तामा प्रगतिको आशासँगै सोमबार अन्तर्राष्ट्रिय बजारमा कच्चा तेलको मूल्य ४ प्रतिशतभन्दा बढीले घटेको छ।

होर्मुज हुँदै जाने तेल ट्याङ्करमाथि आक्रमण बढेपछि इरानी र कतारी अधिकारीबीच यो वार्ता भएको हो।