काभ्रेमा कफीको व्यावसायिक खेती विस्तार

काभ्रेपलाञ्चोक जिल्ला कफी खेतीको क्षेत्रफल र उत्पादन दुवैमा देशकै अग्रणी जिल्ला बनेको छ। राष्ट्रिय चिया तथा कफी विकास बोर्डका अनुसार काभ्रेमा करिब ४९७ हेक्टरमा कफी लगाइएको छ र प्रशोधनपछिको ग्रिन बिन उत्पादन करिब १२१ मेट्रिक टन पुगेको छ। बोर्डका अनुसार देशभर झन्डै ५ हजार ५ सय हेक्टरमा कफी खेती हुँदै आएको छ र ग्रिन बिन उत्पादन करिब ६४२ मेट्रिक टन छ।

अहिले ४३ भन्दा बढी पहाडी जिल्लामा कफी खेती फैलिएको छ। जिल्लाको महाभारत गाउँपालिकाका सबै वडामा कफी खेती पुगेको छ। गाउँपालिकाका अनुसार यहाँ वार्षिक करिब २२० मेट्रिक टन काँचो कफी चेरी उत्पादन हुन्छ।

गाउँपालिका अध्यक्ष कान्छालाल जिम्बाका अनुसार आर्थिक वर्ष २०७७/७८ यता किसानलाई साढे ५ लाखभन्दा बढी सुधारिएका कफी बिरुवा वितरण गरिएको छ। 'जसले रोप्छ कफीको बोट, उसले पाउँछ बीसको नोट' अभियानअन्तर्गत सहकारीमार्फत जीवित बोट गनेर प्रतिबोट २० रुपैयाँ प्रोत्साहन दिइएको छ। महाभारतका किसान शङ्खलाल थोकरले १९ रोपनीमा लगाएको बगैँचाबाट वार्षिक करिब २ हजार किलोग्राम कफी उत्पादन हुने गरेको बताउनुभएको छ।

अर्का किसान कृष्णबहादुर मोक्तान वार्षिक करिब ५०० किलोग्राम कफी उत्पादन गर्नुहुन्छ र उहाँले प्रशोधन, बजार तथा मूल्यको सुनिश्चितता बलियो बनाउनुपर्ने बताउनुभएको छ।