भारतको आन्ध्र र ओडिशामा भीषण वर्षा, रेड अलर्ट जारी

बङ्गालको खाडीमा बनेको बलियो न्यून चापीय प्रणालीका कारण भारतको आन्ध्र प्रदेश र ओडिशामा भारी वर्षा र हावाहुरी सुरु भएको छ। भारतीय मौसम विज्ञान विभागले ओडिशा र आन्ध्र प्रदेशका धेरै क्षेत्रमा रेड अलर्ट जारी गरेको छ। आन्ध्र प्रदेश राज्य विपद् व्यवस्थापन प्राधिकरणका अनुसार यो प्रणाली बुधबार राति कलिङ्गापटनम र पोलाकीबीचबाट तटमा प्रवेश गरेको थियो।

त्यसबेला हावाको गति प्रतिघण्टा ५५ देखि ६५ किलोमिटर थियो भने झोक्कामा ७५ किलोमिटरसम्म पुगेको थियो। भारतीय मौसम विज्ञान विभागका अनुसार पछिल्लो ६ घण्टामा यो प्रणाली प्रतिघण्टा ७ किलोमिटरको गतिमा उत्तर-पश्चिमतर्फ सरेको छ। तटमा पुग्नुअघि चक्रवात बनेको भए यसको नाम अर्णव राखिने थियो।

नेपालको जल तथा मौसम विज्ञान विभागका अनुसार यो प्रणाली उत्तर-पश्चिमतर्फ सर्दै आगामी २४ घण्टामा क्रमशः कमजोर हुने सम्भावना छ। विभागले आज कोशी, बागमती, गण्डकी र लुम्बिनीका थोरै स्थान तथा मधेशका एक-दुई स्थानमा भारीदेखि धेरै भारी वर्षा हुन सक्ने जनाएको छ। भोलि लुम्बिनी र गण्डकी प्रदेशका एक-दुई स्थानमा अति भारी वर्षाको सम्भावना छ।

काठमाडौँमा मेघगर्जनसहित भारी वर्षाको पूर्वानुमान छ, जहाँ वर्षाको सम्भावना ८० प्रतिशत छ। मधेश तथा कोशी, बागमती, गण्डकी र लुम्बिनीको तराईका केही स्थानमा हावाहुरीको पनि सम्भावना छ।