पोखरामा क्यानभासमार्फत हिमाली जलवायु सङ्कटको सन्देश

अन्नपूर्ण हिमालको आधार शिविरमा हिमाली क्षेत्रको जलवायु सङ्कटलाई केन्द्रमा राखेर 'अन्नपूर्ण कला कार्यशाला–२०८३' आजदेखि सुरु भएको छ। कास्कीस्थित आधार शिविरमा हुने यो कार्यशाला अन्नपूर्ण सेञ्चुरी पर्यटन समितिले आयोजना गरेको हो। संयुक्त राष्ट्रसङ्घका महासचिव एन्टोनियो गुटेरेस २०८० कात्तिक १४ गते पुगेको ठाउँमै कार्यशाला भइरहेको छ।

त्यतिबेला हिमाली क्षेत्रमा जलवायु परिवर्तनको असर आफैँ हेरेका गुटेरेसले अमेरिकामा जारी राष्ट्रसङ्घको ८१औँ महासभामा त्यो प्रसङ्ग फेरि उठाएका छन्। हिमनदी छिटो पग्लिँदा 'विश्वको छानो' भत्कँदै गएको भनी नेपालबाट दिएको आफ्नो चेतावनी उनले महासभामा सम्झेका छन्। जलवायु न्यायका लागि नेपालको आवाज उठाउन प्रधानमन्त्री वालेन्द्र शाह पनि अहिले अमेरिकामा हुनुहुन्छ।

जलवायु परिवर्तनले नेपालमा पुर्‍याएको क्षतितर्फ उहाँले महासभामा विश्वको ध्यान खिच्ने जनाइएको छ। भोटेकोशी–त्रिशूलीमा हिमनदी फुटेर आएको बाढीपछि नेपालले जलवायु न्यायको माग गरिरहेका बेला कार्यशालाको विषय छानिएको समितिका अध्यक्ष ललित गुरुङले बताउनुभएको छ।