देशभर आज विश्वकर्मा पूजा मनाइँदै छ। कलकारखाना र ग्यारेजमा मेसिनको पूजा गरिएको छ। मन्दिरहरूमा सवारीसाधनको घुइँचो लागेको छ।

आज असोज १ गते देशभर भगवान् विश्वकर्माको पूजा आराधना गरिँदै छ। उद्योग, कलकारखाना, ग्यारेज तथा व्यापारिक प्रतिष्ठानमा मेसिन र औजारको सफाइ गरिएको छ। आज प्रविधिको पूजा गर्ने परम्परा छ।

धार्मिक मान्यताअनुसार विश्वकर्मालाई देवशिल्पी तथा वास्तुकारका रूपमा पुजिन्छ। पौराणिक कथामा उनले स्वर्गलोक, लंका र द्वारका निर्माण गरेको उल्लेख छ। देवताका अस्त्रशस्त्र पनि उनैले बनाएको विश्वास गरिन्छ।

यसै अवसरमा आज बिहानैदेखि सवारीसाधनको पूजा गर्न भक्तजनको घुइँचो लागेको छ। काठमाडौँका भद्रकाली र दक्षिणकालीलगायत विभिन्न शक्तिपीठमा दर्शनार्थी पुगेका छन्। सीप, दक्षता र कार्यकुशलता प्राप्त हुने जनविश्वासका साथ विश्वकर्माको पूजा गर्ने गरिन्छ।