सुदूरपश्चिममा आज बूढी पोल्ने पर्व मनाइँदै छ। राक्षसी पुतनाको वध गरेको खुसीयालीमा यो पर्व मनाइन्छ। डोटी लगायतका जिल्लामा विशेष रौनक छ।

सुदूरपश्चिम प्रदेशका डोटीलगायत पहाडी जिल्लामा आज परम्परागत ‘बुढी पोल्ने’ पर्व मनाइँदै छ। बालबालिकालाई विषालु दूध खुवाएर मार्न खोज्ने राक्षसी पुतनालाई भगवान् श्रीकृष्णले वध गरेको खुसीयालीमा यो पर्व मनाउने चलन छ। सत्यको विजयको स्मरण गर्दै प्रत्येक वर्ष आजकै दिन यो पर्व मनाइन्छ।

भाद्र सङ्क्रान्तिदेखि सङ्कलन गरिएका काठ र हाँगाबाट बुढीको प्रतीक बनाइन्छ। आज साँझपख सामूहिक रूपमा उक्त प्रतीकलाई जलाउने प्रचलन छ। सोही ठाउँमा काँक्रो खाँदै चारै दिशातर्फ लुतो फाल्ने परम्परा रहेको छ।

पुतनालाई बुढीको प्रतीक मानेर उनको अन्त्यको सम्झना गरिएको हो। यो पर्व स्थानीय मौलिक संस्कृति र परम्परासँग जोडिएको छ।