धनकुटाको छथर जोरपाटीले सुरक्षित आवास कार्यक्रम ल्याएको छ। बसाइँसराइ रोक्न गाउँपालिकाले नयाँ रणनीति बनाएको हो। यसअघिको गाई वितरण कार्यक्रम बन्द गरिएको छ।

धनकुटाको छथर जोरपाटी गाउँपालिकाले बसाइँसराइ रोक्न सुरक्षित आवास कार्यक्रम अघि बढाएको छ। नयाँ परिवारलाई गाउँमै टिकाउन यसअघि सञ्चालन गरिएको दुहुना गाई वितरण कार्यक्रम हटाइएको छ। पशुपालनबाट आम्दानीको बाटो खोल्ने उद्देश्यले ल्याइएको अभियान प्रभावकारी नभएपछि रणनीति फेरिएको हो।

राजधानी दैनिकका अनुसार विगत झन्डै ५ वर्षको अवधिमा करिब ५० परिवारलाई लैनो गाई वितरण गरिएको थियो। पशुपन्छी विकास शाखाका प्रमुख राजकुमार राईले दूध उत्पादनबाट आर्थिक सहजता हुने अपेक्षा पूरा नभएको बताउनुभएको छ। गाई दिएर मात्रै नयाँ परिवारलाई टिकाउन नसकिने निष्कर्षमा गाउँपालिका पुगेको छ।

नयाँ परिवारलाई स्थानीय उत्पादनसँग जोड्ने उद्देश्य राखिएको छ।