भोटेकोशी बाढी प्रभावित ६७ बालबालिकाका लागि ललितपुरमा आवासीय अस्थायी विद्यालय सञ्चालन हुने

रसुवाको भोटेकोशीमा आएको बाढीबाट प्रभावित हाकुबेसी आधारभूत विद्यालयका ६७ जना बालबालिकाका लागि सरकारले ललितपुरमा आवासीय सुविधासहितको अस्थायी विद्यालय सञ्चालनमा ल्याउने भएको छ।

उक्त अस्थायी विद्यालय ललितपुरको गोदावरीमा सञ्चालन गरिनेछ। बाढीका कारण प्रभावित भएका विद्यार्थीको पढाइ नरोकियोस् भन्ने उद्देश्यले यो व्यवस्था गर्न लागिएको हो।

विद्यालयमा कक्षा १ देखि ८ सम्म अध्ययनरत ६७ जना बालबालिकाको नियमित पठनपाठन हुनेछ। पठनपाठनसँगै उनीहरूका लागि आवास, खानपान, स्वास्थ्य उपचार, दैनिक हेरचाह र सुरक्षाको व्यवस्था पनि गरिनेछ।

भोटेकोशीको बाढीले रसुवालगायतका क्षेत्रमा ठूलो क्षति पुर्‍याएको थियो। बाढी प्रभावित विद्यार्थीका लागि सरकारले यस्तो आवासीय अस्थायी विद्यालयको व्यवस्था गर्न लागेको हो।