चाडपर्व सुरक्षा: देशभर ५० हजारभन्दा बढी प्रहरी परिचालित, झापामा भीडको निगरानी ड्रोनबाट

बडादसैँ, तिहार, नेपाल संवत् र छठलाई लक्षित गरेर नेपाल प्रहरीले देशभर ५० हजार ४५८ प्रहरी खटाएको छ। प्रहरीका केन्द्रीय प्रवक्ता डीआइजी अबिनारायण काफ्लेका अनुसार असोज २१ देखि 'चाडपर्वलक्षित विशेष सुरक्षा योजना–२०८३' लागू गरिएको छ। योजनामा अपराध रोकथाम, सडक दुर्घटना न्यूनीकरण र प्रविधिको प्रयोगमा जोड दिइएको छ।

चोरी, डकैती, लुटपाट, ठगी, अनलाइन ठगी, जुवा, सट्टेबाजी, नक्कली नोट र अवैध हुन्डी नियन्त्रणलाई प्राथमिकतामा राखिएको छ। सीमा नाकाबाट हतियार, पटका, विस्फोटक र लागुऔषधको तस्करी रोक्न निगरानी कडा पारिएको छ। झापामा जिल्ला सुरक्षा समितिले मेला, महोत्सव र धार्मिक तथा सांस्कृतिक स्थलको भीड ड्रोनबाट निगरानी गर्ने जनाएको छ।

प्रमुख जिल्ला अधिकारी श्रवणकुमार पोखरेलका अनुसार झापामा नेपाल प्रहरीका १ हजार १९२ र सशस्त्र प्रहरीका ९३५ गरी २ हजार १२७ सुरक्षाकर्मी खटिनेछन्। जिल्लाका ६२ संवेदनशील स्थानमा पिकेट रहनेछन्। ३५ टोलीले सवारीसहित र ३१ टोलीले पैदल गस्ती गर्नेछन् भने सात वटा द्रुत प्रतिकार्य टोली तयारीमा राखिनेछन्।

जिल्ला प्रशासनले बैंक, सपिङ मल र व्यापारिक प्रतिष्ठानलाई सुरक्षा गार्ड चौबीसै घण्टा उच्च सतर्कतामा राख्न र एटीएममा पर्याप्त नगद राख्न निर्देशन दिएको छ। पार्किङ र प्रवेशद्वारमा सुरक्षा जाँच गर्न पनि प्रशासनले भनेको छ।