मेटाद्वारा फेसबुक–इन्स्टाग्राममा ठगीसम्बद्ध ३७ लाखभन्दा बढी सामग्रीमाथि कारबाही

सामाजिक सञ्जाल कम्पनी मेटाले यस वर्ष फेसबुक र इन्स्टाग्राममा ठगीसँग सम्बन्धित ३७ लाखभन्दा बढी अकाउन्ट, पेज तथा सामग्रीमाथि कारबाही गरेको जनाएको छ। सिंगापुर प्रहरी बलसँग पछिल्लो दुई वर्षदेखि भइरहेको सूचना आदानप्रदान र सहकार्यका आधारमा यी कारबाही भएका हुन्। यही सहकार्यले ठगीमा संलग्न समूह र तिनले सञ्चालन गरेका सञ्जाल पहिचान गर्न सघाएको कम्पनीले उल्लेख गरेको छ।

जनवरीदेखि जुनसम्म ठगी र जालसाजीसँग जोडिएका एक लाख १३ हजारभन्दा बढी अकाउन्ट, पेज तथा अन्य इकाइ हटाइएका थिए। जुन महिनामा मात्रै विद्यालय बिदाका बेला सस्तो यात्रा प्याकेज खोज्ने परिवारलाई निशाना बनाउने समूहसँग सम्बन्धित ३३ हजार ६ सयभन्दा बढी अकाउन्ट र पेजमाथि कारबाही भएको छ। जुलाई महिनामा मात्रै ३६ लाखभन्दा बढी ‘शेल पेज’ माथि कारबाही गरिएको मेटाले जनाएको छ।

ठगी गर्ने समूहले कृत्रिम बुद्धिमत्ता प्रयोग गरी नक्कली प्रोफाइल, तस्बिर र भ्रामक कोड बनाउँदै सङ्गठित रूपमा मानिसलाई फसाउने गरेका छन्। अनलाइनमा देखिने अस्वाभाविक सस्ता अफर र आकर्षक प्रलोभनमा नलाग्न, अपरिचित लिङ्कमा क्लिक नगर्न तथा शङ्कास्पद अकाउन्टबारे सतर्क रहन प्रयोगकर्तालाई सुझाव दिइएको छ।