ऊर्जा युद्धविराममा वार्ता गर्न युक्रेन तयार, म्याक्रोनको सुरक्षा जोड

रुससँग ऊर्जा क्षेत्रमा युद्धविरामबारे वार्ता गर्न युक्रेन तयार रहेको त्यहाँका राष्ट्रपति भ्लोदोमिर जेलेन्स्कीले बताउनुभएको छ। संयुक्त राष्ट्रसंघको महासभाका क्रममा सञ्चारकर्मीसँग कुरा गर्दै उहाँले यो प्रस्ताव क्रेमलिनसमक्ष पुर्‍याउन अमेरिका सहमत भएको जानकारी दिनुभयो। पछिल्लो समय रुस र युक्रेन दुवैले एकअर्काका पूर्वाधार लक्षित गरी आक्रमण तीव्र पारेका छन्, जसमा ऊर्जा उत्पादन केन्द्र पनि परेका छन्।

जेलेन्स्कीले अमेरिकासँग प्याट्रियट क्षेप्यास्त्र माग गर्नुभएको छ भने आफ्नै देशमा यस्ता क्षेप्यास्त्र उत्पादन गर्न इजाजतपत्र दिन पनि आग्रह गर्नुभएको छ। फ्रान्सका राष्ट्रपति इम्मानुएल म्याक्रोनले ८१औँ महासभालाई सम्बोधन गर्दै हिउँद नजिकिँदै गर्दा युक्रेनको रक्षा पहिलेभन्दा बढी आवश्यक रहेको औंल्याउनुभयो। रुस र युक्रेनबिच सकेसम्म चाँडो सार्थक वार्ता सुरु गराउन फ्रान्सले हरसम्भव प्रयास गर्ने उहाँको प्रतिबद्धता छ।

गाजाको अवस्थालाई सबैलाई लज्जित बनाउने दृश्य भन्दै उहाँले प्यालेस्टिनी नागरिकका अति आधारभूत अधिकार उल्लंघन भइरहेको बताउनुभयो। अमेरिकी राष्ट्रपति डोनाल्ड ट्रम्पले भने दुवै देशका नेतृत्वसँग नजिकबाट काम गरिरहेको र अनुमान गरिएभन्दा चाँडै सम्झौता हुने दाबी गर्नुभएको छ। दुवै पक्ष लडाइँबाट आजित भइसकेकाले सम्झौता सम्भव रहेको उहाँको तर्क छ।