इरान–अमेरिका दूतस्तरीय भेट पुष्टि, महासभामा बहिष्कार र प्रदर्शन

इरानी विदेशमन्त्री अब्बास अराघची र अमेरिकी विशेष दूत स्टिभ विटकफबिच राष्ट्रसंघीय महासभाको छेउमा भेटवार्ता भएको इरानी सरकारी सञ्चारमाध्यमले जनाएको छ। इरानी सरकारी प्रसारक आईआरआईबीका अनुसार मंगलबार भएको उक्त बैठक विशेष दूत विटकफकै अनुरोधमा आयोजना गरिएको थियो। हर्मुज जलडमरूमध्य पुनः खुला गर्ने विषयमा इरानका सर्त स्पष्ट पार्न विदेशमन्त्री अराघचीले भेटको अनुरोध स्वीकार गर्नुभएको जनाइएको छ।

महासभामा सहभागी हुन इरानी राष्ट्रपति मसुद पेजेस्कियान न्युयोर्कतर्फ प्रस्थान गर्नुभएको छ। प्रस्थानअघि उहाँले महासभालाई इरानको अडान दृढतापूर्वक प्रस्तुत गर्ने अवसरका रूपमा लिएको बताउनुभएको थियो। राष्ट्रपति ट्रम्पका अनुसार इरानी र अमेरिकी पक्षबिच करिब तीन घण्टा लामो छलफल भएको छ, तर त्यसमा को-को सहभागी थिए भन्ने खुलेको छैन।

ट्रम्पले पेजेस्कियानसँग भेट गर्न आफू सम्भवतः तयार रहेको प्रतिक्रिया दिनुभए पनि दुवै पक्षले औपचारिक पुष्टि गरेका छैनन्। त्यस्तो भेट भएमा इरानभित्रकै केही पक्षबाट कडा विरोध हुन सक्ने अनुमान गरिएको छ। ट्रम्पको सम्बोधनका क्रममा इरानी र क्युबाली प्रतिनिधिमण्डलले सभाकक्ष छाडेर बहिष्कार गरेका थिए।

राष्ट्रसंघको मुख्यालयबाहिर इरान सरकारविरुद्ध ब्यानर र प्लेकार्ड बोकेका प्रदर्शनकारी जम्मा भएका छन्। नेपालका तर्फबाट प्रधानमन्त्री बालेन्द्र शाहले बिहीबार महासभालाई सम्बोधन गर्ने कार्यक्रम छ।