ट्रम्पद्वारा ‘एआई फोर्स’ गठन र एआई सल्लाहकार नियुक्तिको घोषणा

अमेरिकी राष्ट्रपति डोनाल्ड ट्रम्पले कृत्रिम बुद्धिमत्तासम्बन्धी काम हेर्ने ‘एआई फोर्स’ गठन गर्ने र एआई प्रमुख नियुक्त गर्ने घोषणा गर्नुभएको छ। सामाजिक सञ्जाल ट्रुथ सोसलमार्फत शनिबार राति उहाँले पहिलो कार्यकालको स्पेस फोर्सकै ढाँचामा नयाँ संरचना बनाइने बताउनुभएको हो। यद्यपि दुवै योजनाको स्वरूप र कार्यान्वयनको तरिका उहाँले खुलाउनुभएको छैन।

कृत्रिम बुद्धिमत्ताको विनाशसम्बन्धी डरलाई उहाँले डेमोक्र्याटहरूको पछिल्लो कोरा भ्रम भन्दै खारेज गर्नुभएको छ। एआईविरुद्धको अभियान डेटा सेन्टरमाथिको विरोधबाट सुरु भए पनि समुदायले त्यसका फाइदा महसुस गरेपछि धेरै हदसम्म असफल भएको उहाँको दाबी छ। सम्भावित दुरुपयोग रोक्न विद्यमान कानुनी प्रणालीको प्रयोग गरिने उहाँको भनाइ छ।

अमेरिका र चीनबीच एआईमा वर्चस्वको होडबाजी चलिरहेका बेला यो घोषणा आएको हो। ट्रम्पको बिहीबार चिनियाँ राष्ट्रपति सी जिनपिङसँग भेटवार्ता हुने कार्यक्रम रहेको छ। उहाँले सन् २०१९ मा स्पेस फोर्स गठन गर्नुभएको थियो।