उत्तर कोरियाद्वारा पूर्वी समुद्रतर्फ ब्यालिस्टिक क्षेप्यास्त्र प्रक्षेपण

उत्तर कोरियाले आइतबार कोरियाली प्रायद्वीपको पूर्वी समुद्रतर्फ क्षेप्यास्त्र प्रक्षेपण गरेको दक्षिण कोरिया र जापानले जनाएका छन्। दक्षिण कोरियाली सेनाको ज्वाइन्ट चिफ्स अफ स्टाफले पूर्वी तटबाट प्रक्षेपण भएको जानकारी दिए पनि यसको प्रकार र दूरीबारे विवरण खुलाएको छैन। जापानको प्रधानमन्त्री कार्यालयले यसलाई सन्दिग्ध ब्यालिस्टिक क्षेप्यास्त्र भनेको छ भने रक्षा मन्त्रालयले प्रक्षेपित वस्तु समुद्रमा खसिसकेको बताएको छ।

जापानी अधिकारीका अनुसार यसबाट कुनै क्षति भएको जानकारी आएको छैन। सार्वजनिक प्रसारक एनएचकेले उक्त वस्तु जापानको विशेष आर्थिक क्षेत्रभन्दा बाहिर खसेको जनाएको छ। गत सेप्टेम्बर १२ मा वोनसान क्षेत्रबाट छोटो दूरीका क्षेप्यास्त्र प्रहार गरिएको केही दिनपछि आइतबारको प्रक्षेपण भएको हो।

प्योङयाङले हालै संयुक्त राष्ट्रसंघको आणविक निगरानी निकायले पारित गरेको प्रस्ताव खारेज गर्दै ग्वामनजिक सम्पन्न अमेरिकी नेतृत्वको जलसैनिक अभ्यासको पनि निन्दा गरेको थियो। नेता किम जोङ उनकी बहिनी किम यो जोङले प्रायद्वीपमा बिग्रँदै गएको तनावका लागि अमेरिकी नेतृत्वका सैन्य गतिविधिलाई दोष दिनुभएको थियो।