पहिरो र जग्गा विवादले बाजुराको छेडेदह ताल जोखिममा

बाजुराको खप्तड छेडेदह गाउँपालिकामा रहेको छेडेदह ताल पहिरोको जोखिममा परेको छ। स्थानीयले प्रेम ताल पनि भन्ने यो ताल गाउँपालिकाको वडा नम्बर ४ र ७ को बीचमा पर्छ। प्राकृतिक सुन्दरता र धार्मिक महत्त्व बोकेको यो तालमा बझाङ, अछामलगायत जिल्लाबाट पनि पर्यटक पुग्ने गरेका छन्।

वडा नम्बर ४ को पड्नापानीमा खसेको पहिरो अहिले तालको किनारसम्म आइपुगेको स्थानीय राजेश सुनारले बताउनुभएको छ। उहाँका अनुसार पहिरोले झन्डै ७० परिवारको खेतीयोग्य जमिन बगाइसकेको छ र तत्काल रोकथाम नभए ताल फुटेर सयौँ परिवार विस्थापित हुन सक्छन्। तालवरिपरिको जग्गा विवाद संरक्षणको मुख्य बाधक बनेको वडा नम्बर ४ का वडाध्यक्ष दलबहादुर धामीले जनाउनुभएको छ।

ताल आसपासका जग्गाधनीहरूले मुआब्जा माग्दै आएकाले तालको व्यवस्थापन झन् चुनौतीपूर्ण बनेको छ। संरक्षण, पूर्वाधार र प्रचारप्रसारको अभावमा पर्यटकीय सम्भावना हुँदाहुँदै ताल अपेक्षित रूपमा चिनिन नसकेको स्थानीयको गुनासो छ।