विपद्पछि सम्पर्क पुनःस्थापना: स्याफ्रुबेँसीमा काठे पुल, म्याग्दीको अन्नपूर्णका सबै सडक सञ्चालनमा

विपद्का कारण सम्पर्कविहीन बनेका रसुवा र म्याग्दीका बस्तीमा आवतजावत फेरि सुरु भएको छ। रसुवाको गोसाइँकुण्ड गाउँपालिका–५ स्याफ्रुबेँसीमा तीन दिनको निरन्तर प्रयासपछि काठे पुल पुनः निर्माण गरिएको छ। कात्तिक १४ गते भोटेकोशीमा आएको बाढीले स्याफ्रुबेँसी खोलाको पुल बगाएको थियो।

त्यसअघि भदौ १० गतेको बाढीले स्याफ्रुबेँसीको पक्की पुल र सडकखण्ड बगाएपछि रसुवाको उत्तरी क्षेत्रमा यातायात पूर्ण रूपमा बन्द भएको थियो। नेपाल रेडक्रस सोसाइटी, दुवै गाउँपालिकाका वडा प्रतिनिधि र कर्मचारी, नेपाल प्रहरी, सशस्त्र प्रहरी बल र स्थानीयको श्रमदानमा पुल बनेको हो। सडक र पैदलमार्ग लामो समय अवरुद्ध हुँदा गोसाइँकुण्ड र आमाछोदिङ्मो गाउँपालिकाका वडा १ देखि ५ सम्मका बासिन्दाले ठूलो सास्ती भोग्नुपरेको थियो।

यता म्याग्दीको अन्नपूर्ण गाउँपालिकाका आठै वडाका सडक डेढ महिनापछि सञ्चालनमा आएका छन्। असोज ८ देखि ११ गतेसम्मको झरीपछि आएको बाढीपहिरोले ती सडक अवरुद्ध बनाएको थियो। वडा ५ को पाउद्धार जोड्ने सडक मर्मत आइतबार सकिएको गाउँपालिका उपाध्यक्ष दिवा तिलिजा पुनले जानकारी दिनुभएको छ।

विकट मानिने पाउद्धार, राम्चे र हिस्तानका सडक खुलेसँगै सबै बस्ती सडक सञ्जालमा जोडिएका छन्। पोखरेबगर–नेपाने–पाउद्धार सडक तत्काल बनाउन नसकिएपछि शिखबाट स्वाँत, किन्दु र झारवाङ हुँदै वैकल्पिक बाटो चलाइएको छ। पाउद्धार–नेपाने खण्डको मर्मत भने जारी छ।

सडक खुलेसँगै क्षतिग्रस्त खानेपानी, सिँचाइ, पदमार्ग, भवन र निजी आवासको पुनर्निर्माणमा सहज हुने अपेक्षा गरिएको छ।