उद्योगमन्त्री साह र भारतीय राजदूत दलेलाबीच भेट, ग्यास पाइपलाइन विस्तारमा छलफल

भारतीय राजदूत सुधाकर दलेलाले उद्योग, वाणिज्य तथा आपूर्तिमन्त्री दीपककुमार साहसँग सोमबार शिष्टाचार भेट गर्नुभएको छ। सिंहदरबारस्थित उद्योग मन्त्रालयमा भएको भेटमा दुई देशबीचको व्यापार र आर्थिक सम्बन्धलाई अझ बलियो र फराकिलो बनाउने विषयमा विचार आदानप्रदान भएको छ। मन्त्री साहको सचिवालयका अनुसार भेटमा नेपाल र भारतबीच ग्यास पाइपलाइन विस्तारबारे पनि छलफल भएको छ।

राजदूत दलेला भर्खरै नेपालका लागि नियुक्त हुनुभएको हो। यसैबीच नेपाल आयल निगमले कात्तिक १४ गतेदेखि लागू गरेको मूल्यसूचीअनुसार काठमाडौँमा पेट्रोल र डिजेल प्रतिलिटर २०० रुपैयाँ छ। एलपी ग्यासको मूल्य देशभरका सबै डिपोमा प्रतिसिलिन्डर २०६० रुपैयाँ छ।

विराटनगर, वीरगन्ज, चराली, अमलेखगञ्ज, नेपालगञ्ज र धनगढीलगायतका डिपोमा पेट्रोल र डिजेल प्रतिलिटर १९७ रुपैयाँ ५० पैसा छ। सुर्खेत र दाङमा यो मूल्य १९९ रुपैयाँ तोकिएको छ। पोखरा र दिपायलमा भने काठमाडौँ बराबरकै २०० रुपैयाँ छ।

मट्टितेलको मूल्य पनि सबै ठाउँमा पेट्रोल र डिजेलकै बराबर छ।