आठ वर्षमा दुई हजारभन्दा बढी स्मारक र आठ हजार पुरातात्विक वस्तुको अभिलेखीकरण

नेपाल सम्पदा अभिलेखीकरण परियोजनाले ८ वर्षमा देशका २ हजारभन्दा बढी ऐतिहासिक स्मारक र ८ हजारभन्दा बढी पुरातात्विक वस्तुको विस्तृत विवरण सङ्कलन गरेको छ। परियोजनाले २ हजार ५०० भन्दा बढी शिलालेखको पनि विवरण जुटाएको छ। सन् २०१८ मा सुरु भएको यो परियोजनाले जात्रा, पर्व र अमूर्त सांस्कृतिक सम्पदाबारे वृत्तचित्र र अभिलेख पनि बनाएको छ।

सङ्कलित विवरण पुरातत्व विभागको राष्ट्रिय सम्पदा सूची र परियोजनाको डिजिटल डेटाबेसमा राखिएको छ। जर्मनीको हाइडेलबर्ग विश्वविद्यालयअन्तर्गतको हाइडेलबर्ग सेन्टर फर ट्रान्सकल्चरल स्टडिज, हाइडेलबर्ग एकेडेमी अफ साइन्सेस एन्ड ह्युम्यानिटिज, नेपालको सराफ फाउन्डेसन र पुरातत्व विभागले मिलेर यो परियोजना चलाएका हुन्। बेलायतको आर्केडिया फण्डले यसलाई मुख्य आर्थिक सहयोग गरेको थियो।

हाइडेलबर्ग विश्वविद्यालय पुस्तकालय, युनेस्को नेपाल र काठमाडौँ भ्याली प्रिजर्भेसन ट्रस्टलगायत संस्था पनि यसमा सहभागी थिए।