गाई तिहार: दाङमा ६०० भन्दा बढी गाईको सामूहिक पूजा, गौशालालाई सहयोग

गाई तिहारका अवसरमा सोमबार दाङको बेलझुण्डीस्थित गौशालामा ६०० भन्दा बढी गाईको सामूहिक पूजा गरिएको छ। योगी आदित्यनाथ फाउन्डेसनद्वारा सञ्चालित गौशालामा स्थानीयको सहभागितामा पूजा गरिएको हो भने सोही दिन लक्ष्मीको हवन पनि गरिएको थियो। फाउन्डेसनका अध्यक्ष भोलानाथ योगीका अनुसार हरेक वर्ष गाई तिहारमा गौशालामै पूजा गर्ने गरिएको छ।

विश्वविद्यालयको जग्गा भाडामा लिएर चलाइएको गौशालामा गाईको दानापानी जुटाउन कठिन भएको र दाताको सहयोगले नै सञ्चालन भइरहेको उहाँले बताउनुभएको छ। यस दिन दाताहरूले गाईलाई खानेकुरा पनि दिएका थिए। कास्कीको पोखरा महानगरपालिका–१५ मझुवास्थित पोखरा गौशालामा कात्तिक २१ गतेदेखि ५ दिने गाई पूजा महोत्सव चलिरहेको छ।

पुम्दीकोट धार्मिक तथा पर्यटन क्षेत्र विकास समितिका अध्यक्ष चन्द्रकान्त बरालले १ लाख ११ हजार १११ रुपैयाँ सहयोग गर्नुभएको छ। संयोजक लक्ष्मण पौडेलका अनुसार हालसम्म करिब ३ लाख रुपैयाँ नगद र पराल, दाना, चोकरजस्ता जिन्सी सहयोग जुटेको छ। अर्घाखाँचीको सन्धिखर्क नगरपालिका–६ नरपानीस्थित श्रीकृष्ण गौशालामा पनि गाई तिहारमा विशेष पूजा गरिएको छ।

सडकमा छाडिएका स्थानीय जातका करिब २०० गाई पालिरहेको उक्त गौशाला २०७२ सालमा खनालको निजी खर्चमा स्थापना भएको हो। नगरपालिकाले गौशालालाई थप सहयोग गर्ने प्रतिबद्धता जनाएको छ। तनहुँको शुक्लागण्डकी र व्यास नगरपालिकाका गौसंरक्षण केन्द्रमा पनि सामूहिक गाईपूजा गरिएको छ।