संस्कृति बिग्रँदा राजनीति खलबलियो, ‘बात बहादुर’ होइन ‘काम बहादुर’ बनौँ: ओली

नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले समाजको सांस्कृतिक मनोवृत्ति बिग्रिँदा राजनीति पनि खलबलिएको बताउनुभएको छ। एमाले भक्तपुर जिल्ला कमिटीले सोमबार दसैँ, तिहार, नेपाल संवत् ११४७ र छठको अवसरमा आयोजना गरेको शुभकामना आदानप्रदान कार्यक्रममा उहाँले यस्तो धारणा राख्नुभएको हो। अध्यक्ष ओलीले नागरिकलाई कुरा मात्र गर्ने 'बात बहादुर' होइन, काम गरेर देखाउने 'काम बहादुर' बन्न आग्रह गर्नुभएको छ।

उहाँका अनुसार अत्यधिक लोभ र स्वार्थले मानिसलाई नैतिक पतनतर्फ धकेल्छ। खराब काम गर्ने मानिसलाई पशुसँग दाँज्नु पनि पशुमाथि अन्याय हुने उहाँले टिप्पणी गर्नुभएको छ, किनकि पशुले षड्यन्त्र र जालझेल गर्दैनन्। सार्वजनिक सम्पत्ति जोगाउनुको सट्टा आगजनी, तोडफोड र लुटपाट गर्ने प्रवृत्ति बढेकोमा उहाँले असन्तुष्टि जनाउनुभएको छ।

भाटभटेनीका पसलमा भएको लुटपाट र आगजनीले विश्वमा नेपालीको छवि बिगारेको उहाँको भनाइ छ। आफ्नो नेतृत्वको सरकारले ठूला सभाहल, रङ्गशाला र पूर्वाधार निर्माणलाई प्राथमिकता दिएको ओलीले दाबी गर्नुभएको छ। गोदावरीमा बनेको अन्तर्राष्ट्रियस्तरको सभागृहमा हजारौँ मानिस अट्ने व्यवस्था रहेको उहाँले बताउनुभएको छ।

भक्तपुरमा पनि ठूला सार्वजनिक तथा सामुदायिक सभाहल आवश्यक रहेको उहाँको भनाइ छ। बुद्धको उपदेशबाट चलेको शान्तिको संस्कृतिलाई देशव्यापी बनाउनुपर्नेमा पनि ओलीले जोड दिनुभएको छ।