भोटेकोशी बाढीको एकीकृत प्रारम्भिक प्रतिवेदन मुख्यमन्त्रीलाई हस्तान्तरण

गत भदौ १० गते भोटेकोशी र त्रिशूली नदी प्रणालीमा आएको बाढीले पाँच प्रमुख क्षेत्रमा मात्रै करिब १३ अर्ब ४४ करोड रुपैयाँ बराबरको क्षति पुर्‍याएको प्रारम्भिक अनुमान गरिएको छ। आन्तरिक मामिला, कानून तथा सहकारी मन्त्रालयका प्रदेश सचिव महेश भट्टराईले बिहीबार बागमती प्रदेशका मुख्यमन्त्री किरण थापा मगरलाई एकीकृत प्रारम्भिक प्रतिवेदन बुझाउनुभएको छ। प्रतिवेदन १५ वटा विषयगत क्षेत्रको विवरण मिलाएर तयार गरिएको हो।

भौतिक संरचना, कृषि, शिक्षा, उद्योग व्यवसाय र खानेपानी तथा सिँचाइलाई प्रमुख पाँच क्षेत्र मानिएको छ। सडक, पुल र सरकारी भवनमा करिब ५ अर्ब ६९ करोड रुपैयाँ बराबरको नोक्सानी भएको छ। विद्यालयमा करिब ४ अर्ब ९८ करोड र उद्योग तथा व्यापारिक पसलमा करिब २ अर्ब ९७ करोड रुपैयाँ बराबरको क्षति आकलन गरिएको छ।

खानेपानी तथा सिँचाइमा करिब ५२ करोड ७९ लाख र बाली, पशुधन तथा फार्ममा करिब २८ करोड ५९ लाख रुपैयाँ बराबरको क्षति प्रतिवेदनमा उल्लेख छ। बाढीले रसुवा, नुवाकोट र धादिङमा ठूलो क्षति पुर्‍याएको प्रतिवेदनले जनाएको छ।