डाटा सेन्टरमा साइबर आक्रमण, सोमबार सेयर कारोबार बन्द

डेटा सेन्टरमा साइबर आक्रमण भएपछि नेपाल स्टक एक्सचेन्ज, नेप्सेले आज सोमबारको सेयर कारोबार स्थगित गरेको छ। ब्रोकर कम्पनीहरूको कारोबार व्यवस्थापन प्रणाली अर्थात् टिएमएसको सर्भर राखिएको डेटा हब प्राइभेट लिमिटेडमा असोज ४ गते बिहानदेखि समस्या देखिएको नेप्सेले सूचनामा जनाएको छ। नेप्सेका अनुसार उक्त डेटा सेन्टरमा ७२ वटा कारोबार सदस्य कम्पनीका सर्भर छन्।

समस्या नसुल्झिँदै कारोबार चलाउँदा नेप्सेकै प्रणालीमा क्षतिको जोखिम देखिएकाले कारोबार रोक्नुपरेको सूचनामा उल्लेख छ। स्टक ब्रोकर एसोसिएसन अफ नेपालले पनि आजको कारोबार रोक्न निवेदन दिएपछि नेप्सेले धितोपत्र सूचीकरण तथा कारोबार नियमावली, २०७५ अनुसार नियमित कारोबार स्थगित गरेको हो। डेटा हबले आइतबार कार्यालय समय सुरु हुनुअघि नै आफ्नो टिएमएस होस्टिङ पूर्वाधारमा र्‍यान्समवेयर आक्रमण पहिचान गरेको थियो।

कम्पनीले फरेन्सिक विश्लेषण र प्रणाली पुनःप्राप्तिका उपाय अपनाइरहेको जनाएको छ। प्रयोगकर्तालाई बलपूर्वक प्रणालीमा लगइन गर्ने कोसिस नगर्न पनि अनुरोध गरिएको छ। नेप्सेका प्रमुख कार्यकारी अधिकृतका अनुसार आफ्नै टिएमएस भएका १२ वटा ब्रोकरको प्रणाली भने चलाउन सकिने अवस्थामा छ।

कारोबार पटकपटक अवरुद्ध भएकोमा लगानीकर्ताले नेप्से, धितोपत्र बोर्ड र अर्थ मन्त्रालयसँग गम्भीरता देखाउन माग गरेका छन्।