अन्डाको मूल्य फेरि बढ्यो

नेपाल लेयर्स कुखुरा पालक संघले अन्डाको समर्थन मूल्य पुनः बढाएको छ। संघका अनुसार नयाँ मूल्य असोज ७ गतेदेखि नै लागू भइसकेको छ। यसपटक ठूला आकारका अन्डाको मात्रै मूल्य समायोजन गरिएको छ।

संघले सार्वजनिक गरेको मूल्यसूची अनुसार सबैभन्दा ठूलो नौ एक्सएल अन्डा प्रतिक्रेट करिब ६१५ रुपैयाँ र ठूलो अन्डा प्रतिक्रेट करिब ६०० रुपैयाँ पुगेको छ। नौ एक्सएल अन्डामा प्रतिक्रेट करिब १५ रुपैयाँ र ठूलो अन्डामा करिब १० रुपैयाँ थपिएको हो। डिपो तथा डिलर मूल्य नौ एक्सएलका लागि प्रतिपेटी करिब ४ हजार ३०० रुपैयाँ र ठूलो अन्डाका लागि करिब ४ हजार २०० रुपैयाँ तोकिएको छ।

यसअघि गत भदौ १९ गते ठूलो अन्डाको मूल्य प्रतिक्रेट करिब ५९० रुपैयाँ कायम थियो।

मिडियम अन्डा प्रतिक्रेट करिब ५५० रुपैयाँ र सानो अन्डाको समर्थन मूल्य प्रतिपेटी करिब ३ हजार २०० रुपैयाँ यथावत् राखिएको छ। उपभोक्ता मूल्यसमेत नबढाइएको संघले उल्लेख गरेको छ। खुद्रामा प्रतिगोटा करिब २५ रुपैयाँ कायम छ।

काठमाडौंमा देशभरका अन्डा उत्पादकको भौतिक तथा भर्चुअल उपस्थितिमा भएको संयुक्त बैठकले यो मूल्य तय गरेको संघले जनाएको छ।