एडीबीको प्रक्षेपण: आर्थिक वृद्धि सुस्त, महँगीको दबाब कायम

एसियाली विकास बैंक एडीबीले सन् २०२६ मा नेपालको आर्थिक वृद्धिदर करिब ३ दशमलव ९ प्रतिशतमा सीमित रहने प्रक्षेपण गरेको छ। बुधबार सार्वजनिक भएको एसियन डेभलपमेन्ट आउटलुक सेप्टेम्बर २०२६ प्रतिवेदनले जुलाईमा गरिएको प्रक्षेपणलाई यथावत् राखेको हो। सन् २०२५ मा नेपालले करिब ४ दशमलव ४ प्रतिशत आर्थिक वृद्धि हासिल गरेको थियो।

सन् २०२७ का लागि गरिएको प्रारम्भिक अनुमान भने घटाएर करिब ४ दशमलव १ प्रतिशत बनाइएको छ। व्यापारमा देखिएको सुस्तता, ऊर्जा आपूर्तिमा अवरोध र असामान्य मौसमी धक्काका कारण यस क्षेत्रका अर्थतन्त्रको आगामी वर्षको वृद्धि प्रभावित हुने प्रतिवेदनमा औँल्याइएको छ। युरोप र पश्चिम एसियामा जारी युद्ध तथा भीषण एल निन्योले एसियाभर मूल्यको दबाब बढाउँदै लगेको एडीबीले जनाएको छ।

इरानमा पुनः चर्किएको लडाइँ र यमनतर्फको द्वन्द्व विस्तारले कच्चा तेल तथा परिष्कृत उत्पादनको आपूर्ति अवरुद्ध बनेको उल्लेख छ। युक्रेनमाथिको रुसी युद्धले खाद्यान्न ढुवानीमा बाधा पुर्‍याएको प्रतिवेदनमा उल्लेख छ। एल निन्योका कारण भारतदेखि थाइल्यान्डसम्मको बालीनाली सङ्कटमा परेको, जलविद्युत् उत्पादन घटेको र पानामा नहरजस्ता जलमार्गमा आवागमन सीमित बनेको समेत उल्लेख छ।

जोखिमहरू अझै नकारात्मक दिशातर्फ ढल्किएको एडीबीका मुख्य अर्थशास्त्री अल्बर्ट पार्कले प्रतिवेदनमा उल्लेख गरेका छन्।