एकै दिन सेयर किनबेच गर्ने इन्ट्राडे कारोबारको अवधारणापत्र सार्वजनिक

नेपाल धितोपत्र बोर्डले एउटै दिन सेयर किनेर बेच्न मिल्ने अन्तरदिवसीय अर्थात् इन्ट्राडे कारोबारको अवधारणापत्र, २०८३ सार्वजनिक गर्दै सरोकारवालासँग सुझाव मागेको छ। हाल नेप्सेमा पूर्ण विद्युतीय प्रणाली र टी प्लस टु राफसाफ चक्र लागू भए पनि दोस्रो बजारको मूल कारोबार डेलिभरीमा आधारित छ। बजारमा तरलता बढाउन र मूल्य अन्वेषणलाई प्रभावकारी बनाउन यो अवधारणा ल्याइएको बोर्डले जनाएको छ।

अवधारणापत्रले लगानीकर्ता संरक्षणलाई पहिलो प्राथमिकता दिँदै जोखिममा आधारित नियमन र चरणबद्ध कार्यान्वयनलाई मुख्य आधार बनाएको छ। वास्तविक समयमा कारोबार र अनुगमन गर्ने प्रविधि तथा पारदर्शी बजार सञ्चालन पनि यसका आधार हुन्। प्रस्तावअनुसार पहिलो चरणमा पहिले किनेर पछि बेच्ने कारोबार मात्र सुरु गरिनेछ।

पहिले बेचेर पछि किन्ने कारोबार भने धितोपत्र सापटी तथा उधारो प्रणाली र कभर्ड सर्ट सेलिङको पूर्वाधार पर्याप्त बनेपछि मात्र ल्याइनेछ। सुरुमा नियमित कारोबार हुने, पर्याप्त तरलता भएका र बजार दुरुपयोगको जोखिम कम भएका सीमित धितोपत्रमा मात्र यो सुविधा दिइनेछ। यसका लागि योग्य धितोपत्रको छुट्टै सूची बनाइनेछ।

परीक्षण चरणको अनुभव र जोखिम मूल्याङ्कनपछि कारोबारको दायरा बढाइने प्रस्ताव छ। नयाँ लगानीकर्तालाई अभिमुखीकरण तालिम दिने कुरा पनि अवधारणापत्रमा समेटिएको छ।