चक्रवात ‘अर्नब’को प्रभाव: आजदेखि शनिबारसम्म देशभर वर्षा र हिमपातको सम्भावना

जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार हाल देशमा पश्चिमी वायुको आंशिक प्रभाव छ। बङ्गालको खाडीमा बनेको चक्रवात ‘अर्नब’को प्रभाव पनि रहने भएकाले आजदेखि देशका विभिन्न स्थानमा वर्षा र हिमपात हुन सक्ने महाशाखाले जनाएको छ।

महाशाखाका अनुसार आज कोशी, बागमती, गण्डकी र लुम्बिनी प्रदेशका एक–दुई स्थानमा भारी वर्षा हुन सक्छ। कात्तिक १२ गते साँझदेखि १४ गतेसम्म देशका अधिकांश स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ। कर्णाली र सुदूरपश्चिम प्रदेशमा पनि मेघगर्जन, चट्याङ र असिनासहित वर्षा हुन सक्छ। काठमाडौँमा शुक्रबार भारी वर्षाको सम्भावना छ।

मौसम विज्ञान विभागका अनुसार अति शक्तिशाली चक्रवात ‘अर्नब’ भारतको आन्ध्र प्रदेशको तटीय क्षेत्रबाट जमिनमा प्रवेश गरिसकेको छ। यो प्रणाली उत्तरपश्चिमतर्फ सर्दै क्रमशः कमजोर हुने र उत्तर प्रदेश तथा बिहार आसपास पुग्ने पूर्वानुमान छ। नेपालमा भने भारतमा जस्तो हावाहुरी नचल्ने बताइएको छ।

सम्भावित विपद्बाट जोगिन जिल्ला प्रशासन कार्यालय झापाले सर्वसाधारणलाई तीन दिनसम्म विशेष सतर्कता अपनाउन आग्रह गरेको छ। चक्रवातको प्रभावका कारण झापामा बाढी र डुबानको जोखिम बढेको प्रशासनले जनाएको छ।