भारी वर्षा र हिमपहिरोको जोखिम: कात्तिक ११ देखि १५ सम्म उच्च हिमाली क्षेत्रमा नजान आग्रह

पर्यटन विभागले पर्यटक तथा पर्वतारोहीलाई उच्च हिमाली क्षेत्रमा नजान आग्रह गरेको छ। कात्तिक ११ देखि १५ गतेसम्म देशका विभिन्न स्थानमा भारी वर्षा हुने र हिमाली क्षेत्रमा हिमपात तथा हिमपहिरोको जोखिम रहेको भन्दै विभागले यस्तो आग्रह गरेको हो।

नेपाल मौसम विज्ञान विभागको मौसम बुलेटिनअनुसार उक्त अवधिमा मेघगर्जन, चट्याङ र हावाहुरीसहित भारी वर्षा हुन सक्ने सम्भावना छ। यही जोखिमलाई ध्यानमा राख्दै पर्यटन विभागले उच्च हिमाली क्षेत्रको यात्रा नगर्न आग्रह गरेको हो।

यस्तै, मुस्ताङमा जिल्ला प्रशासन कार्यालय र लोमान्थाङ गाउँपालिकाले पनि अक्टोबर २९ देखि ३१ सम्म उच्च हिमाली क्षेत्रमा पदयात्रा नगर्न आग्रह गरेका छन्।

तपाईं यो अवधिमा हिमाली क्षेत्रतर्फ यात्राको योजना बनाउँदै हुनुहुन्छ भने सम्बन्धित निकायको सूचना र मौसम पूर्वानुमान हेरेर मात्र निर्णय लिन विभागले आग्रह गरेको छ।