ट्रम्प–सी भेटपछि अमेरिका र चीनद्वारा ३० अर्ब डलरका वस्तुमा भन्सार कटौतीको सूची

अमेरिका र चीनले करिब ३० अर्ब अमेरिकी डलर बराबरका वस्तुमा भन्सार घटाउने सूची सार्वजनिक गरेका छन्। नेपाल राष्ट्र बैंकले तोकेको डलरको खरिद दर १५३ रुपैयाँ १ पैसाका आधारमा यो रकम करिब ४५ खर्ब ९० अर्ब रुपैयाँ हुन्छ। अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच शुक्रबार वासिङ्टनमा शिखर वार्ता भएको केही दिनपछि यो सूची आएको हो।

सी जिनपिङको भ्रमणपछि ह्वाइट हाउसले गैरसंवेदनशील वस्तुमा कर सहुलियत दिने सिफारिसमा सहमति भएको घोषणा गरेको थियो र बेइजिङले शनिबार त्यसको पुष्टि गरेको थियो। चीनको सूचीमा अमेरिकाबाट आउने एक हजार ६ सयभन्दा बढी प्रकारका वस्तु छन्, जसमा कृषि उपज, व्यक्तिगत स्याहारका सामग्री, काठ, चिकित्सा उपकरण र कोइला पर्छन्। अमेरिकाले भने चीनबाट आउने करिब ७७ वर्गका वस्तुमा भन्सार घटाउनेछ, जसमा आतिशबाजी र भान्साका भाँडाकुँडा पर्छन्।

कुन वस्तुमा कति कर घट्ने र कहिलेदेखि लागू हुने भन्ने विवरण भने अझै सार्वजनिक भएको छैन। चिनियाँ वाणिज्य मन्त्रालयले नयाँ व्यवस्थाले दुई देशबीचको व्यापारिक सहयोग बलियो बनाउने जनाएको छ। गत वर्ष एक समय चीनबाट आउने वस्तुमा अमेरिकी भन्सार दर करिब १४५ प्रतिशतसम्म पुगेको थियो।

तनाव घट्दै गएपछि अमेरिकाले चीनमाथिको केही भन्सार दर घटाइसकेको छ।