भोटेकोशी–त्रिशूली विपद् विशेष समितिको सभापति चयन असोज १४ मा

भोटेकोशी–त्रिशूली विपद् तथा हिमाली जलवायु परिवर्तनसम्बन्धी संसदीय विशेष समितिको सभापति असोज १४ गते बुधबार चयन हुने भएको छ। सोमबारको प्रतिनिधिसभा बैठकमा सभामुख डोलप्रसाद अर्यालले प्रतिनिधिसभा नियमावलीको नियम १७६ बमोजिम उक्त दिन दिउँसो २ बजे निर्वाचन हुने जानकारी दिनुभयो। प्रतिनिधिसभाले असोज ५ गते बसेको बैठकबाट १५ सदस्यीय यो समिति गठन गरेको थियो।

भदौ १० गते रसुवाको भोटेकोशीमा आएको बाढीले रसुवा, नुवाकोट र धादिङलगायत जिल्लामा ठूलो भौतिक क्षति पुर्‍याएपछि समिति बनाइएको हो। समितिमा सांसद अच्युतम लामिछाने, अनुष्का श्रेष्ठ, ध्रुवराज राई, निशा डाँगी, मिङ्मा ग्याबु शेर्पा र सुजाता तामाङलगायत सदस्य हुनुहुन्छ। समितिको कार्यावधि ३ महिना तोकिएको छ र आवश्यक परे म्याद थप्न सकिने व्यवस्था छ।

समितिले भोटेकोशी–त्रिशूली विपद्का कारण, प्रभाव र क्षतिको अध्ययन तथा अनुगमन गर्नेछ। कार्यादेशअनुसार विपद्को उत्पत्ति, घटनाक्रम, तत्कालीन कारण र जोखिम बढाउने तत्त्वको वैज्ञानिक प्रमाणमा आधारित अध्ययन पनि समितिले गर्नेछ। हिमाली क्षेत्रमा जलवायु परिवर्तनको प्रभाव र विपद्सँग यसको सम्भावित सम्बन्ध पनि समितिले केलाउनेछ।

जलवायुजन्य विपद् न्यूनीकरणका लागि नीतिगत आधार तयार गर्ने जिम्मेवारी पनि समितिलाई दिइएको छ।