राष्ट्रिय सभामा सरकारको कार्यशैली र विपद् व्यवस्थापनप्रति असन्तुष्टि

राष्ट्रिय सभाको सोमबारको बैठकमा सांसदहरूले सरकारको कार्यशैलीप्रति असन्तुष्टि जनाएका छन्। उनीहरूले बाढीपहिरो प्रभावितको उद्धार र राहत प्रभावहीन भएको आरोप लगाएका छन्। शून्य समयमा बोल्दै उनीहरूले सुशासनको नारा व्यवहारमा नदेखिएको र दैलेखको ग्यास उत्खननमा ढिलाइ भएको विषय पनि उठाएका छन्।

सांसद राजेन्द्रलक्ष्मी गैरेले असोज ८ गतेदेखिको वर्षाले पाल्पाका सबै स्थानीय तहमा सडक अवरुद्ध भएको जानकारी दिनुभयो। उहाँका अनुसार दर्जनौँ घर पुरिएका छन् र कालीगण्डकीको कटानले पुलहरू बगाएको छ। सांसद सम्झना देवकोटाले मनाङ, मुस्ताङ र मर्स्याङ्दी तटीय क्षेत्रमा सयौँ परिवार विस्थापित भएको बताउनुभयो।

सांसद पूजा चौधरीले राहत वितरण प्रणाली फितलो रहेको आरोप लगाउनुभयो। उहाँले पीडितका लागि शिक्षा, खाद्य र खानेपानीको संकट तत्काल समाधान गर्न माग गर्नुभयो। उहाँले पुनर्निर्माणको योजना ल्याउन पनि माग गर्नुभयो।

सांसदहरूले खाना पकाउने ग्यासको अभावबारे चिन्ता जनाएका छन्। उनीहरूले दैलेखमा पुष्टि भएको मिथेन ग्यास भण्डारको उत्खनन तत्काल अघि बढाउन आग्रह गरेका छन्। सांसद विष्णुदेवी पुडासैनीले सडकका खाल्डाखुल्डी पुर्न नसक्नु सुशासनको उपहास भएको टिप्पणी गर्नुभयो।

सांसद रुक्मिणि कोइरालाले आगामी चाडपर्वमा यात्रा सुरक्षित बनाउन भत्किएका सडकको मर्मतमा सरकारको ध्यानाकर्षण गराउनुभयो। नेपाली कम्युनिष्ट पार्टीकी सांसद जयन्तीदेवी राईले विपद्का बेला सरकारले तीनै तहसँग समन्वय गर्नुपर्नेमा जोड दिनुभयो। उहाँले सबै दल र सरोकारवाला निकायलाई पनि साथमा लिन आग्रह गर्नुभयो।

उहाँले राहत शिविरमा रहेका बालबालिका, महिला र वृद्धवृद्धाको सुरक्षामा विशेष ध्यान दिन पनि भन्नुभयो।