देउवा पक्षको महाधिवेशन: सबै तहमा जेनजी र ४० वर्षमुनिका युवा अनिवार्य

नेपाली कांग्रेसका निवर्तमान सभापति शेरबहादुर देउवा पक्षले समानान्तर १५औँ महाधिवेशन गर्दैछ। यसका लागि वडादेखि केन्द्रसम्मका सबै कार्यसमितिमा युवा प्रतिनिधित्व अनिवार्य गरिएको छ। पक्षको केन्द्रीय निर्वाचन समितिले निर्वाचन निर्देशिका तयार पारेको छ।

निर्देशिकाअनुसार हरेक कार्यसमितिमा १८ देखि २८ वर्षका नवयुवा र ४० वर्षमुनिका युवा समेटिनुपर्छ। निर्देशिकाले महिला, दलित महिला, श्रमिक, पेशाकर्मी, उद्योगी–व्यवसायी, लैङ्गिक अल्पसङ्ख्यक र पिछडिएको क्षेत्रको समावेशीकरण पनि अनिवार्य गरेको छ। कार्यतालिकाअनुसार असोज १५ गते वडा अधिवेशन हुनेछ।

मंसिर २१ देखि २३ गतेसम्म काठमाडौँमा केन्द्रीय महाधिवेशन हुनेछ। पूर्वमहामन्त्री शशांक कोइराला महाधिवेशन तयारी समितिका संयोजक हुनुहुन्छ। उहाँमार्फत ७७ जिल्लामा संयोजक तोकिएका छन्।

१४औँ महाधिवेशनबाट निर्वाचित तथा मनोनीत केन्द्रीय सदस्य र प्रदेश सभापतिहरू यो महाधिवेशनमा स्वतः प्रतिनिधि हुनेछन्। गगन थापा नेतृत्वको संस्थापन पक्षमा भने नेताहरू वडाबाटै निर्वाचित भएर आउनुपर्छ। देउवा पक्षमा सभापतिको उम्मेदवार बन्न ३० हजार रुपैयाँ शुल्क लाग्नेछ।

संस्थापन पक्षले यसका लागि ४० हजार रुपैयाँ तोकेको छ। उपसभापति र महामन्त्रीका लागि २५ हजार रुपैयाँ तोकिएको छ। सहमहामन्त्रीका लागि २० हजार र केन्द्रीय सदस्यका लागि १० हजार रुपैयाँ लाग्नेछ।

वडा सभापतिको उम्मेदवारी शुल्क भने २५० रुपैयाँ छ। संस्थापन पक्षले आफ्नो १५औँ महाधिवेशन असोज १६ गतेबाट सुरु गर्दैछ।