७२ ब्रोकरको कारोबार प्रणालीमा साइबर आक्रमण, बिटक्वाइनमा फिरौती माग

सेयर बजारको अनलाइन कारोबार प्रणालीमा भएको र्‍यान्समवेयर आक्रमणले डेटा हब प्रालिको प्रणालीमा रहेका ७२ ब्रोकर कम्पनीको कारोबार विवरण इन्क्रिप्ट गरिदिएको छ। नेप्सेले वाईकोसँग र वाईकोले ब्रोकरहरूसँग ट्रेडर्स म्यानेजमेन्ट सिस्टम सञ्चालनको सम्झौता गरेका छन्, र वाईकोको यो प्रणाली ८ वर्षभन्दा बढी समयदेखि डेटा हबको पूर्वाधारमा चल्दै आएको छ। आक्रमणकारीले डेटा खोलिदिने बदलामा बिटक्वाइनमार्फत फिरौती मागेको छ, तर कति रकम मागिएको हो भन्ने डेटा हबले खुलाएको छैन।

थप जोखिम रोक्न सोमबार सेयर कारोबार नै बन्द गरिएको थियो। डेटा हबका अनुसार आक्रमण बिहान ५ बजेर ३७ मिनेटमा भएको थियो। त्यसअघि बिहान ४ बजे लिइएको ब्याकअपका आधारमा करिब ४८ घण्टापछि प्रणाली फेरि सञ्चालनमा ल्याइएको छ।

डेटा हबका प्रबन्ध निर्देशक दीपक श्रेष्ठका अनुसार नेपालका धेरै संस्थाले चलाउने एकै किसिमको सफ्टवेयरमार्फत आक्रमण भएको प्रारम्भिक अध्ययनमा देखिएको छ। त्यस्तो सफ्टवेयर चलाउने अन्य संस्थाले पनि आफ्नो प्रणालीको सुरक्षा तुरुन्तै जाँच्नुपर्ने उहाँको सुझाव छ। घटनाबारे नेपाल र इसराइलका साइबर सुरक्षा टोलीले संयुक्त अनुसन्धान गरिरहेका छन्।

आक्रमण कसले र किन गरेको हो भन्ने अझै खुलेको छैन।