ट्रम्प–सी वार्ता, एआई मानव नियन्त्रणमा राख्न सीको जोड, अमेरिकालाई दुई पाण्डा

चिनियाँ राष्ट्रपति सी जिनपिङले अमेरिकी राष्ट्रपति डोनाल्ड ट्रम्पसँग ह्वाइट हाउसमा वार्ता गर्दै कृत्रिम बौद्धिकता अर्थात् एआईको विकास मानिसकै नियन्त्रणमा रहनुपर्नेमा जोड दिनुभएको छ। चीन र अमेरिका दुवै एआईमा अग्रणी भएकाले यसलाई जनहितमा व्यवस्थापन गर्ने जिम्मेवारी दुवैको रहेको उहाँको भनाइ छ। भेटमा राष्ट्रपति सीले एटलान्टाको चिडियाखानामा पिङ पिङ र फु शुआङ नामका २ वटा पाण्डा पठाउने घोषणा गर्नुभएको छ।

राष्ट्रपति ट्रम्पले सुरक्षा, प्रविधि र सुपर इन्टेलिजेन्सबारे अहिले गरिने निर्णयले दशकौँसम्म शान्ति र समृद्धि प्रवर्द्धन गर्न सक्ने बताउनुभएको छ। उहाँले दुई देशबीचको व्यापार सम्बन्ध थप सन्तुलित बनाउन काम भइरहेको उल्लेख गर्दै सीसँगको सम्बन्धलाई महान् मित्रता भन्नुभएको छ। दुवै नेताले व्यापार, एआई, सुरक्षा, प्रविधि र सैन्य संवादलगायत विषयमा धारणा राख्नुभएको छ।

सीले निरन्तर संवादले आपसी विश्वास बढाउने बताउँदै चिनियाँ कम्पनीले अमेरिकामा निष्पक्ष व्यवहार पाउने अपेक्षा राख्नुभएको छ। सी दोस्रो पटक अमेरिकाको राजकीय भ्रमणमा आउने पहिलो चिनियाँ नेता बन्नुभएको छ। उहाँसँग उपप्रधानमन्त्री हे लिफेङ र विदेशमन्त्री वाङ यी पनि हुनुहुन्छ।

दुवै नेताले लिखित मन्तव्य मात्र दिनुभएको थियो र पत्रकारका प्रश्न लिनुभएन। वार्तापछि ह्वाइट हाउसमा राजकीय रात्रिभोजको कार्यक्रम तय छ।