शुक्रबार मध्यरातदेखि संसद्का दुवै सदनको अधिवेशन अन्त्य

राष्ट्रपति रामचन्द्र पौडेलले सङ्घीय संसद्का दुवै सदनको चालु अधिवेशन अन्त्य गर्नुभएको छ। मन्त्रिपरिषद्को असोज १३ गतेको सिफारिसमा संविधानको धारा ९३ को उपधारा २ अनुसार यो निर्णय गरिएको राष्ट्रपतिको कार्यालयले जनाएको छ। कार्यालयले बिहीबार जारी गरेको विज्ञप्तिअनुसार असोज १६ गते शुक्रबार राति १२ बजेदेखि प्रतिनिधि सभा र राष्ट्रिय सभा दुवैको अधिवेशन अन्त्य हुनेछ।

संविधानले अधिवेशन बोलाउने र अन्त्य गर्ने अधिकार मन्त्रिपरिषद्को सिफारिसमा राष्ट्रपतिलाई दिएको छ। यो अधिवेशन २०८३ साल वैशाख २८ गतेदेखि सुरु भएको थियो। यही अवधिमा संसद्बाट वार्षिक बजेट र सरकारको नीति तथा कार्यक्रम स्वीकृत भएका छन्।

अध्यादेश प्रतिस्थापन गर्ने ६ वटा विधेयक पारित भई प्रमाणीकरणसमेत भएका छन्। वैकल्पिक वित्त परिचालन विधेयक र सहिद दशरथ चन्द स्वास्थ्य विज्ञान विश्वविद्यालय विधेयक पनि पारित भई प्रमाणीकरण भएका छन्। नेपाल विशेष सेवा ऐन, २०४२ को साविकको व्यवस्था फेरि जगाउने विधेयक पनि प्रमाणीकरण भएको छ।

अधिवेशनमा मन्त्रीहरूसँग सदनमा प्रत्यक्ष प्रश्नोत्तर भए पनि प्रधानमन्त्रीसँग प्रश्नोत्तर कार्यक्रम हुन सकेन।