स्ट्यान्डर्ड चार्टर्डको १६ प्रतिशत नगद लाभांश, निफ्राको नाफा २० प्रतिशत घट्यो

स्ट्यान्डर्ड चार्टर्ड बैंकले सेयरधनीलाई चुक्ता पुँजीको १६ प्रतिशत नगद लाभांश दिने प्रस्ताव गरेको छ। बैंकको सञ्चालक समितिको सोमबार बसेको बैठकले गत आर्थिक वर्षको मुनाफाबाट यो लाभांश दिने निर्णय गरेको हो। प्रस्तावित लाभांश कर प्रयोजनसहितको रहेको बैंकले जनाएको छ।

नेपाल राष्ट्र बैंकको स्वीकृति र आगामी साधारणसभाबाट पारित भएपछि मात्र सेयरधनीले यो रकम पाउनेछन्। बैंकले साधारणसभाको मिति भने तय गरिसकेको छैन। बैंकको चुक्ता पुँजी करिब १० अर्ब रुपैयाँ छ।

बैंकले गत वर्ष १९ प्रतिशत नगद लाभांश दिएको थियो भने त्यसअघिको वर्ष १९ प्रतिशत नगदसँगै साढे ६ प्रतिशत बोनस सेयर दिएको थियो। यता, नेपाल इन्फ्रास्ट्रक्चर बैंक अर्थात् निफ्राको खुद नाफा चालु आर्थिक वर्षको पहिलो त्रैमासमा करिब २० प्रतिशतले घटेको छ। बैंकले सार्वजनिक गरेको अपरिष्कृत वित्तीय विवरणअनुसार पहिलो तीन महिनामा निफ्राले करिब साढे १६ करोड रुपैयाँ खुद नाफा कमाएको छ।

गत वर्षको सोही अवधिमा यस्तो नाफा करिब २१ करोड रुपैयाँ थियो। खुद ब्याज आम्दानी झन्डै ८ प्रतिशतले घटेर करिब ३४ करोड रुपैयाँमा झरेकाले नाफामा असर परेको विवरणमा उल्लेख छ। निफ्राको वार्षिक प्रतिसेयर आम्दानी करिब ३ रुपैयाँ र प्रतिसेयर नेटवर्थ करिब ११२ रुपैयाँ रहेको छ।

बैंकको जगेडा कोषमा करिब २ अर्ब ६७ करोड रुपैयाँ सञ्चित छ।