महासभामा ट्रम्पको सम्बोधन: इरानमाथि दबाब, आठ युद्ध रोकेको दाबी

अमेरिकी राष्ट्रपति डोनाल्ड ट्रम्पले संयुक्त राष्ट्रसंघको ८१औँ महासभालाई सम्बोधन गर्दै इरानले कहिल्यै आणविक हतियार बनाउन नपाउने बताउनुभएको छ। मंगलबार राष्ट्रसंघीय मुख्यालयमा बोल्दै उहाँले इरानसामु सम्झौता वा थप कारबाहीको विकल्प रहेको चेतावनी दिनुभयो। आणविक कार्यक्रम त्यागे र आतंकवादलाई साथ नदिए इरानसँग पूर्ण आर्थिक सहकार्य गर्ने प्रस्ताव आफूले गरेको उहाँको दाबी छ।

इरानलाई आर्थिक रूपमा एक्ल्याउने प्रयासमा साथ दिन उहाँले अन्य मुलुकलाई आग्रह गर्नुभयो। आगामी नोभेम्बरमा हुने अमेरिकी मध्यावधि निर्वाचनले इरानसम्बन्धी आफ्नो नीति नबदल्ने पनि उहाँले स्पष्ट पार्नुभयो। सम्बोधनमा उहाँले आफ्नो कार्यकालमा आठ द्वन्द्व समाधान गर्न भूमिका खेलेको दाबी दोहोर्‍याउनुभयो, जसमा भारत–पाकिस्तान तनाव पनि समेटिएको उहाँको भनाइ छ।

गाजाको शान्ति योजनामा करिब ३० मुलुक जोडिएको र रुस–युक्रेन युद्ध अन्त्यका लागि पहल भइरहेको उहाँले सुनाउनुभयो। अमेरिकासँग पर्याप्त अत्याधुनिक हतियार र गोला–बारुद रहेको तथा सैन्य भण्डार तीव्र गतिमा बढिरहेको उहाँको दाबी छ। राष्ट्रसंघको बजेट कटौती गरिएको जानकारी दिँदै उहाँले कृत्रिम बुद्धिमत्ताको नियमनको विरोध गर्नुभयो।

क्युबालाई असफल राष्ट्र भन्दै आलोचना गरेका ट्रम्पले ग्रिनल्यान्डमा अमेरिकी सैन्य उपस्थिति विस्तार गर्ने योजना पनि सुनाउनुभयो।