सेबोनको नयाँ आईपीओ मापदण्ड मस्यौदामा इप्पानको आपत्ति

स्वतन्त्र ऊर्जा उत्पादकहरूको संस्था, नेपाल—इप्पानले नेपाल धितोपत्र बोर्ड, सेबोनले प्रस्ताव गरेको सार्वजनिक निष्कासनको सामान्य योग्यतासम्बन्धी निर्देशिकाको मस्यौदा पुनरावलोकन गर्न माग गरेको छ। इप्पानले मंगलबार सेबोनमा लिखित सुझाव दर्ता गराएको जनाएको छ। प्रस्तावित व्यवस्थाले जलविद्युत् आयोजनाको पुँजी व्यवस्थापन, सार्वजनिक निष्कासन प्रक्रिया र लगानीको निरन्तरतामा असर पार्न सक्ने संस्थाको ठहर छ।

ऊर्जा क्षेत्र आर्थिक विकास, औद्योगिकीकरण, रोजगारी सिर्जना, राजस्व परिचालन र विदेशी मुद्रा आर्जनसँग प्रत्यक्ष जोडिएको भन्दै इप्पानले लगानी अवरुद्ध हुने शर्त नराख्न आग्रह गरेको छ। इप्पान अध्यक्ष मोहन डाँगीले बैंकिङ, बीमा, जलविद्युत्, औषधि तथा उत्पादनमूलक उद्योगको व्यावसायिक प्रकृति र पुँजी संरचना फरक हुने भएकाले एउटै मापदण्ड सबैमा लागू गर्न उपयुक्त नहुने बताउनुभएको छ। जलविद्युत्का लागि छुट्टै परिच्छेद र छुट्टै आईपीओ चेकलिस्ट बनाउनुपर्ने उहाँको सुझाव छ।

मस्यौदामा साधारण सेयर निष्कासनअघि कम्पनीले निरन्तर व्यवसाय सञ्चालन गरेको हुनुपर्ने प्रावधान राखिएकोमा त्यसले निर्माणाधीन आयोजनालाई आवेदन दिनबाटै रोक्ने इप्पानको तर्क छ। संस्थाका अनुसार भौतिक प्रगति करिब ६५ प्रतिशत पुगेपछि आईपीओ आवेदन दिन पाउनुपर्छ। प्रतिसेयर नेटवर्थ अंकित मूल्यभन्दा कम हुन नहुने व्यवस्था यथावत् रहे करिब ६० प्रतिशत आयोजनाले सर्वसाधारणलाई सेयर निष्कासन गर्न नसक्ने इप्पानको दाबी छ।

ऋण–पुँजी अनुपात सेबोनले तोक्न नहुने पनि संस्थाले उल्लेख गरेको छ।