चिनीको भाउ एक सातामै घट्यो, कुखुराको मासु भने महँगियो

काठमाडौंको खुद्रा बजारमा एक सातायता चिनीको मूल्य प्रतिकिलो करिब १ सय ५० रुपैयाँबाट करिब १ सय २० रुपैयाँमा झरेको छ। मूल्य घट्नुका साथै उपभोक्ताले चिनी सहजै पाइरहेका छन्। प्रतिनिधि सभाको उद्योग तथा वाणिज्य र श्रम तथा उपभोक्ता हित समितिका सभापति रहबर अन्सारीको सक्रियतापछि चिनी उद्योगले भ्याटबाहेक प्रतिकिलो करिब ८५ रुपैयाँका दरले साल्ट ट्रेडिङलाई बिक्री गर्न थालेको व्यवसायीले बताएका छन्।

भारतले गत चैत ३० गते चिनी निर्यातमा प्रतिबन्ध लगाएको भोलिपल्टै नेपालका उद्योगीले प्रतिकिलो करिब २ रुपैयाँ मूल्य बढाएका थिए। सुनसरीको इस्टर्न सुगर मिल्सले चैत ३० सम्म भ्याटबाहेक कारखाना मूल्य प्रतिकिलो करिब ८६ रुपैयाँ राखेकोमा क्रमशः बढाउँदै करिब १ सय ७ रुपैयाँसम्म पुर्‍याएको थियो। अर्कातिर कुखुराको मासु भने महँगिएको छ।

काठमाडौं उपत्यकामा ब्रोइलर कुखुराको मासुको मूल्य दुई महिनायता प्रतिकिलो करिब १ सय रुपैयाँ बढेर करिब ४ सय १५ रुपैयाँ पुगेको व्यवसायी संघले तोकेको छ। खुद्रा बजारमा भने करिब ४ सय ४० देखि ४ सय ७० रुपैयाँसम्म पर्ने गरेको उपभोक्ता तथा व्यवसायीको भनाइ छ। सरकारी अनुगमन कमजोर हुँदा संघहरूले मिलेमतोमा भाउ बढाएको आरोप उपभोक्ता अधिकारकर्मीले लगाएका छन्।