हवाई ट्राफिक नियन्त्रणको केबल काटिँदा अमेरिकामा सयौँ उडान प्रभावित

अमेरिकामा हवाई ट्राफिक नियन्त्रणसँग जोडिएको सञ्चार केबल काटिँदा सोमबार न्युयोर्क र फिलाडेल्फिया क्षेत्रका विमानस्थलमा सयौँ उडान अवरुद्ध भएका छन्। अमेरिकी सङ्घीय उड्डयन प्रशासनका अनुसार मुख्य सञ्चार लाइनमा पहिल्यै समस्या आएको थियो, त्यसपछि निर्माणको क्रममा ब्याकअप फाइबर अप्टिक लाइन पनि काटिएको थियो। न्युजर्सी ट्रान्जिटका मजदुरले खन्ने क्रममा गल्तीले उक्त केबल काटेका थिए।

यसले गर्दा फिलाडेल्फियास्थित प्रमुख नियन्त्रण केन्द्रका नियन्त्रकले केही समय राडार र सञ्चार सम्पर्क गुमाएका थिए। समाचार संस्था एपीका अनुसार नेवार्क लिबर्टी अन्तर्राष्ट्रिय विमानस्थलमा ६०० भन्दा बढी र फिलाडेल्फिया अन्तर्राष्ट्रिय विमानस्थलमा २०० भन्दा बढी उडान रद्द भएका छन्। उडान अनुगमन गर्ने वेबसाइट फ्लाइटराडार२४ का अनुसार नेवार्कमा स्थानीय समयअनुसार बिहान ९ बजेर ४० मिनेटदेखि साँझ ५ बजेर २० मिनेटसम्म एउटा पनि व्यावसायिक विमान अवतरण भएको थिएन।

जेएफके र लागार्डिया विमानस्थलका उडान पनि प्रभावित भएका छन्। पेन्सिलभेनिया, न्युजर्सी र म्यासाचुसेट्सका विमानस्थलमा पनि उडान रोकिएका थिए। स्थानीय समयअनुसार सोमबार साँझ सञ्चार लाइन मर्मत गरिएको छ।

संयुक्त राष्ट्रसङ्घ महासभाका लागि विश्वका नेताहरू न्युयोर्क आइरहेकै बेला यो अवरोध भएको हो।