मार्फामा स्याउ टिप्ने र खाने उत्सवमा पर्यटकको भीड

मुस्ताङको मार्फामा चलिरहेको स्याउ टिप्ने र खाने उत्सवमा सहभागी हुन आएका पर्यटकको स्याउ बगानमा लर्को लागेको छ। घरपझोङ गाउँपालिका–२ मार्फास्थित शीतोष्ण बागवानी विकास केन्द्रले मुस्ताङमा कृषि पर्यटन बढाउने उद्देश्यले केन्द्रकै परिसरमा यो उत्सव आयोजना गरेको हो। आइतबारदेखि सुरु भएको उत्सव असोज १५ गतेसम्म चल्नेछ।

केन्द्र प्रमुख प्रकाश पन्थका अनुसार उत्सवमा आउनेले बोटबाटै ताजा स्याउ आफैँ टिपेर त्यहीँ रसिलो र गुलियो स्वाद लिन पाउँछन्। पर्यटक तथा स्थानीय दुवैका लागि केन्द्रले प्रतिव्यक्ति २०० रुपैयाँ प्रवेश शुल्क तोकेको प्रमुख पन्थले जानकारी दिनुभएको छ। बिरुवाको हाँगा भाँच्ने वा बोट बिगार्ने जो कोहीलाई केन्द्रले १ हजार रुपैयाँ जरिवाना गर्ने नियम बनाएको छ।

हिमालपारिको जिल्ला मुस्ताङ स्याउ उत्पादनका लागि देशभर प्रसिद्ध छ। जिल्लामा अहिले स्याउ टिप्ने मुख्य याम सुरु भएको छ र किसानहरू फल टिपेर बजारमा पठाउन व्यस्त छन्। उत्सव आयोजना गर्ने यो केन्द्र विक्रम संवत् २०२३ मा स्थापना भएको हो।

जल तथा मौसम विज्ञान विभागका अनुसार मुस्ताङ पर्ने गण्डकी प्रदेशको हिमाली भू-भागका केही स्थानमा आज मेघगर्जनसहित मध्यमसम्मको वर्षा वा हिमपातको सम्भावना छ।