सरकारद्वारा १७ सहसचिवको सरुवा, अर्थ मन्त्रालयका दुई सहसचिव पनि फेरिए

सरकारले प्रशासन सेवाका १७ जना सहसचिवको सरुवा तथा जिम्मेवारी हेरफेर गरेको छ। असोज १३ गते मंगलबार बसेको मन्त्रिपरिषद् बैठकको निर्णयअनुसार उहाँहरूलाई विभिन्न मन्त्रालय, संवैधानिक आयोग, प्रदेश र स्थानीय तहमा खटाइएको हो। अर्थ मन्त्रालय मातहतका दुई सहसचिव पनि सरुवामा पर्नुभएको छ।

त्रिभुवन अन्तर्राष्ट्रिय विमानस्थल भन्सार कार्यालयका रामकृष्ण पुडासैनीलाई दाङको घोराही उपमहानगरपालिकाको प्रमुख प्रशासकीय अधिकृत बनाइएको छ। सहमहालेखा नियन्त्रक विष्णुप्रसाद ज्ञवालीलाई गृह मन्त्रालयमा पठाइएको छ। उहाँहरूको ठाउँमा नयाँ सहसचिव नपठाइएकाले ती पद तत्कालका लागि रिक्त रहेको अर्थ मन्त्रालयले जनाएको छ।

मुस्लिम आयोगमा रहेका सहसचिव नमराज घिमिरेलाई उद्योग, वाणिज्य तथा आपूर्ति मन्त्रालयमा ल्याइएको छ भने त्यहाँका युवराज अधिकारीलाई उहाँको ठाउँमा मुस्लिम आयोग पठाइएको छ। उद्योग मन्त्रालयकै अर्का सहसचिव रामबन्धु सुवेदी पर्यटन तथा नागरिक उड्डयन मन्त्रालयमा सरुवा हुनुभएको छ। संघीय मामिला तथा सामान्य प्रशासन मन्त्रालयमा जिम्मेवारीविहीन रहेका चार सहसचिवले नयाँ काम पाउनुभएको छ।

डा. पुष्पराज शाहीलाई धरान उपमहानगरपालिकाको प्रमुख प्रशासकीय अधिकृत, भूपेन्द्र थापालाई लगानी बोर्ड, वेदप्रसाद खरेललाई राष्ट्रिय सुरक्षा परिषद्को सचिवालय र चिरञ्जिवी पौडेललाई राष्ट्रिय दलित आयोगमा खटाइएको छ। बागमती प्रदेशका प्रदेश सचिव जीव लाल भुसाललाई ऊर्जा, जलस्रोत तथा सिँचाइ मन्त्रालय र मधेश प्रदेशका प्रदेश सचिव होमनाथ पौडेललाई प्रधानमन्त्री तथा मन्त्रिपरिषद्को कार्यालयमा सरुवा गरिएको छ।