एआई नियमनका लागि ट्रम्प र प्रमुख कम्पनीबीच स्वैच्छिक सहमति

अमेरिकी राष्ट्रपति डोनल्ड ट्रम्प र प्रमुख एआई कम्पनीका अगुवाबीच आर्टिफिसियल इन्टेलिजेन्स नियमनसम्बन्धी स्वैच्छिक सम्झौतामा सहमति भएको छ। ह्वाइट हाउसमा प्रविधि कम्पनीका प्रतिनिधिसँगको बैठकपछि राष्ट्रपति ट्रम्प र प्रतिनिधिसभाका सभामुख माइक जोन्सनले सम्झौता घोषणा गर्नुभएको हो। एआईले मानवजातिमा निम्त्याउन सक्ने खतरा सम्बोधन गर्न प्रशासनमाथि दबाब बढिरहेका बेला यो सहमति भएको हो।

सम्झौताले एआईको सुरक्षा र जोखिम नियन्त्रणको मुख्य जिम्मेवारी कम्पनीहरूलाई नै दिएको छ। यसअनुसार कम्पनीहरूले फ्रन्टियर मोडलको तालिम र सञ्चालनमा आन्तरिक जोखिम समीक्षा, बाह्य अडिट र बहुतहको नियन्त्रण प्रणाली अपनाउनेछन्। राष्ट्रपति ट्रम्पले सम्झौतालाई 'नैतिक रूपमा बाध्यकारी' भन्दै कम्पनीहरूले एकअर्काको निगरानी गर्ने बताउनुभएको छ।

सरकारी सुरक्षा उपायको माग फेरि अस्वीकार गर्दै उहाँले यसबाट 'व्यापक स्वनियमन' हुने दाबी गर्नुभएको छ। एक्सियोससँगको कुराकानीमा ट्रम्पले राष्ट्रिय गुप्तचर निर्देशक जे क्लेटनलाई नयाँ 'एआई जार' बनाउन सकिने सङ्केत गर्नुभएको छ। १८ वटा गुप्तचर निकायको नेतृत्व गरिरहेका क्लेटन ट्रम्पका मुख्य गुप्तचर सल्लाहकार हुनुहुन्छ।

ट्रम्पले यो पदका लागि आगामी ३ देखि ४ दिनभित्र नाम घोषणा गर्ने इच्छा व्यक्त गर्नुभएको छ। यसअघि उहाँले एआई क्षेत्रमा चीनसँग कुनै पनि संयुक्त व्यवसाय अस्वीकार गर्नुभएको थियो। ओपनएआईले मङ्गलबार 'डट्स' नामक नयाँ एआई सहायक सार्वजनिक गरेको छ।