झन्डै दुई दशकपछि इराकबाट अमेरिकी सेना फिर्ता

अमेरिकाले इराकमा बाँकी रहेका आफ्ना सैनिक बुधबार फिर्ता गर्ने तय गरेको छ। सन् २०२४ मा इराक र अमेरिकाबीच इस्लामिक स्टेटविरुद्धको अमेरिकी नेतृत्वको गठबन्धन सैन्य अभियान अन्त्य गर्ने सहमति भएको थियो। त्यसपछि गठबन्धनका सैनिक देशभरका आधार छाडेर उत्तरी कुर्दिस्तान क्षेत्रमा सीमित भएका थिए, जहाँबाट अब अन्तिम फिर्ती हुँदै छ।

बीबीसीका अनुसार यससँगै सन् २००३ को आक्रमणयता कायम अमेरिकी सैन्य उपस्थिति अन्त्य हुनेछ। सद्दाम हुसेनलाई सत्ताबाट हटाएपछि इराक लामो समय विद्रोह र साम्प्रदायिक हिंसामा फसेको थियो। अमेरिकाले सन् २०११ मा सेना फिर्ता गरे पनि इस्लामिक स्टेटले इराक र सिरियाको ठूलो भूभाग कब्जा गरेपछि सन् २०१४ मा फेरि सैनिक पठाएको थियो।

उक्त समूह इराकमा सन् २०१७ र सिरियामा सन् २०१९ मा पराजित भए पनि बाँकी सदस्यविरुद्ध कारबाहीका लागि गठबन्धन सेना इराकमै रहँदै आएको थियो। बीबीसीका अनुसार सन् २००७ मा इराकमा करिब १ लाख ७० हजार अमेरिकी सैनिक थिए, जुन सन् २०२३ को डिसेम्बरसम्म करिब २ हजार ४ सयमा झरेको थियो। एजेन्सीका अनुसार छिमेकी इरानको राजधानी तेहरानमा अमेरिकी फिर्तीलाई उत्सवका रूपमा मनाइएको छ।