आईएल टी–२० अक्सनमा कप्तान दीपेन्द्रसिंह ऐरी अन्सोल्ड

नेपाली टी–ट्वान्टी अन्तर्राष्ट्रिय क्रिकेट टोलीका कप्तान दीपेन्द्रसिंह ऐरी यूएईको इन्टरनेसनल लिग टी–ट्वान्टीको आगामी सिजनका लागि भएको अक्सनमा अन्सोल्ड हुनुभएको छ। उहाँले १० हजार अमेरिकी डलर आधार मूल्य राखेर अक्सनमा नाम दर्ता गराउनुभएको थियो। आधार मूल्य भनेको टोलीले बोली सुरु गर्नुपर्ने न्यूनतम रकम हो।

नेपाल राष्ट्र बैंकको १५ असोजको खरिद दर १५३ रुपैयाँ ४ पैसाका हिसाबले यो रकम झन्डै १५ लाख ३० हजार रुपैयाँ हुन्छ। अक्सनमा नाम आए पनि कुनै पनि टोलीले उहाँका लागि बोली लगाएनन्। ऐरी यसअघि लगातार दुई सिजन यही लिगको टोली गल्फ जायन्ट्समा अनुबन्धित हुनुहुन्थ्यो।

गल्फ जायन्ट्सको आधिकारिक टोली सूचीमा नाम भए पनि उहाँले ती दुवै सिजनमा एउटा पनि खेल खेल्ने मौका पाउनुभएन। आईएल टी–ट्वान्टीमा यस पटक पहिलो पटक अक्सन प्रक्रियामार्फत खेलाडी छनोट गरिएको छ। अक्सनमा विभिन्न देशका खेलाडी सहभागी थिए।

ऐरी नेपाली क्रिकेटका प्रमुख टी–ट्वान्टी खेलाडीमध्ये एक मानिनुहुन्छ। उहाँले विश्वका विभिन्न फ्रेन्चाइज टी–ट्वान्टी प्रतियोगितामा खेलिसक्नुभएको छ, तर आईएल टी–ट्वान्टीमा अहिलेसम्म मैदान उत्रने अवसर पाउनुभएको छैन।