आईसीसीको नयाँ नियम: ढिलो गर्ने ब्याटरलाई ५ रन पेनाल्टी, महिला क्रिकेटमा छुट्टै बल

अन्तर्राष्ट्रिय क्रिकेट परिषद्, आईसीसीले खेलको गति बढाउने उद्देश्यसहित नयाँ खेल शर्त लागू गरेको छ। अक्टोबर १ वा त्यसपछि थालिने अन्तर्राष्ट्रिय शृङ्खलामा यी नियम लागू हुनेछन् भने पहिल्यै सुरु भएका शृङ्खलामा पुरानै नियम कायम रहनेछ। पुरुष क्रिकेटमा बलर रनअपको सुरुमा पुग्दासम्म ब्याटर तयार नभए बलर इन्डका अम्पायरले पहिलो पटक चेतावनी र दोस्रो पटक अन्तिम चेतावनी दिनेछन्।

तेस्रो पटकदेखि हरेक ढिलाइमा फिल्डिङ टोलीले ५ रन पेनाल्टी पाउनेछ। बारम्बार ढिलाइ गरे आचारसंहिताअनुसार थप कारबाही पनि हुन सक्नेछ। पुरुष, महिला र जुनियर क्रिकेटका लागि बलको आकार र तौलको छुट्टाछुट्टै मापदण्ड तोकिएको छ।

रन रोक्न वा रनआउट गर्न स्टम्पतर्फ फ्याँकिएको बललाई मात्र अब ओभरथ्रो मानिनेछ। बल रोक्दा वा अर्को फिल्डरलाई दिँदा हुने मिसफिल्ड भने ओभरथ्रोमा गनिने छैन। टेस्ट क्रिकेटमा पिंक बल प्रयोगसम्बन्धी व्यवस्थामा पनि परिवर्तन गरिएको छ।