२० सडकखण्ड पूर्ण अवरुद्ध, काठमाडौँ उपत्यका झन्डै नाकाबन्दीमा

अविरल वर्षा र पहिरोका कारण देशभरका २० सडकखण्ड पूर्ण रूपमा अवरुद्ध भएका छन्। गृह मन्त्रालयको विपद् प्रतिकार्य शाखाका अनुसार शुक्रबार राति ८ बजेसम्म कोशी, बागमती, गण्डकी र लुम्बिनीका सडक बन्द छन्, जसमध्ये सबैभन्दा धेरै १२ वटा बागमतीमा छन्। दुई सडकमा भने एकतर्फी आवागमन भइरहेको छ।

पृथ्वी राजमार्ग, बीपी राजमार्ग र कान्ति लोकपथलगायतका मुख्य मार्ग अवरुद्ध हुँदा काठमाडौँ उपत्यका अन्य भागसँग लगभग कटिएको छ। उपत्यका भित्रिने मार्गमध्ये त्रिभुवन राजपथ मात्र सञ्चालनमा छ। सडक विभागका अनुसार पृथ्वी राजमार्गको कृष्णभीर, चौकीभीर, जवाङखोला र फिस्लिङमा यातायात पूर्ण बन्द छ।

धादिङमा यही राजमार्गका करिब ८ स्थानमा शुक्रबार राति साढे ८ बजेसम्म अवरोध रहेको स्थानीय निकायले जनाएका छन्। बीपी राजमार्गको माम्ती, पिप्ले, चारसयबेँसी र चौकीडाँडामा पनि सडक पूर्ण रूपमा अवरुद्ध छ। नारायणगढ–मुग्लिन सडक, सिद्धिचरण लोकमार्ग र चामे–बेसीशहर खण्ड पनि बन्द छन्।

कोशीमा मेची कोरिडोर र मध्यपहाडी लोकमार्गसहित चार सडक अवरुद्ध छन्। तनहुँको घाँसीकुवामा खसेको पहिरो भने प्रहरीको १५ सदस्यीय टोलीले हटाएर पृथ्वी राजमार्ग खुलाएको छ।