२५ जिल्लामा आज पनि यातायात पूर्ण बन्द, रेड अलर्ट क्षेत्र थपियो

बाढी र पहिरोको उच्च जोखिम देखिएका २५ जिल्लामा शनिबार पनि दिनरात सवारीसाधन पूर्ण रूपमा बन्द गर्न राष्ट्रिय विपद् जोखिम न्यूनीकरण तथा व्यवस्थापन प्राधिकरणले सुझाव दिएको छ। बङ्गालको खाडीमा बनेको न्यूनचापीय प्रणालीका कारण पश्चिम नेपालमा वर्षा बढेपछि प्राधिकरणले ७७ वटै जिल्लालाई रातो, सुन्तला र पहेँलो गरी तीन तहमा छुट्याएको हो। रातो सूचीमा सुदूरपश्चिमका दार्चुला, बझाङ, बाजुरा, कैलाली र कञ्चनपुर तथा कर्णालीका डोल्पा, जुम्ला, कालीकोट, मुगु, हुम्ला र सुर्खेत परेका छन्।

लुम्बिनीका दाङ, प्युठान, रुपन्देही, पाल्पा, अर्घाखाँची, गुल्मी, कपिलवस्तु, बाँके र बर्दिया तथा गण्डकीका मनाङ, मुस्ताङ, गोरखा, लमजुङ र स्याङ्जा पनि यही सूचीमा छन्। सुन्तला रङमा परेका झन्डै ३० जिल्लामा रातिको समयमा यातायात बन्द गर्न भनिएको छ भने दिउँसोको निर्णय जिल्ला मनसुन प्रतिकार्य कमान्ड पोस्टले अवस्था हेरेर गर्नेछ। पहेँलो रङका जिल्लालाई सतर्क रहन अनुरोध गरिएको छ।

जल तथा मौसम विज्ञान विभागको पूर्वानुमानअनुसार लुम्बिनी र सुदूरपश्चिमका एक–दुई स्थानमा अति भारी वर्षा हुन सक्छ। वीरेन्द्रनगर, नेपालगञ्ज र पोखरामा वर्षाको सम्भावना ९० प्रतिशत छ।