सुदूरपश्चिममा वर्षा बढ्दै, चार जिल्ला उच्च जोखिममा, कञ्चनपुरमा पूर्वतयारी

बङ्गालको खाडीमा बनेको न्यूनचापीय प्रणाली पश्चिमतर्फ सर्दै गएकाले सुदूरपश्चिममा शुक्रबार रातिदेखि वर्षा बढ्ने पूर्वानुमान छ र प्रदेशका चार जिल्ला उच्च जोखिममा परेका छन्। जल तथा मौसम विज्ञान कार्यालय अत्तरियाका प्रमुख इन्जिनियर सञ्जयकुमार साहका अनुसार शनिबारदेखि पानी पर्ने क्रम अझ बढ्नेछ। प्रदेशका केही भागमा भारी वर्षा हुँदा बाढी, पहिरो र सडक अवरोधको खतरा बढ्ने भएकाले थप सावधानी अपनाउनुपर्ने उहाँले बताउनुभएको छ।

कार्यालयका अनुसार हिमाली, पहाडी र तराई तीनै भू-भागका धेरै स्थानमा मेघगर्जन र चट्याङसहित मध्यम वर्षा हुने र एक–दुई स्थानमा अति भारी वर्षा हुन सक्ने सम्भावना छ। जल तथा मौसम विज्ञान विभागले पनि शनिबार सुदूरपश्चिमका थोरै स्थानमा भारीदेखि धेरै भारी वर्षाको पूर्वानुमान गरेको छ। कञ्चनपुरका प्रमुख जिल्ला अधिकारी मदन कोइरालाका अनुसार जिल्ला प्रशासनले स्थानीय तह र सुरक्षा निकायसँग मिलेर जोखिमयुक्त क्षेत्रको निगरानी बढाएको छ।

नदी किनार र डुबान हुने क्षेत्रलाई विशेष निगरानीमा राखिएको छ र उद्धार तथा राहतका लागि जनशक्ति तयारी अवस्थामा छ। सञ्चारमाध्यम, सामाजिक सञ्जाल र माइकिङमार्फत जनतालाई जोखिमको सूचना दिइँदै छ। सुरक्षा निकायले पनि उद्धार टोली र आवश्यक उपकरण तयारी राखेका छन्।