रोशी खोलाले खतराको तह पार गर्‍यो

बिहीबारदेखिको अविरल वर्षाका कारण काभ्रेपलाञ्चोकको रोशी खोलाको जलसतहले शुक्रबार साँझ ५ बजे खतराको तह पार गरेको छ। पनौतीस्थित बाढी सूचना केन्द्रका अनुसार खोलाको जलसतह दिनभर घटबढ भइरहेको थियो। विभागका जलविज्ञका अनुसार साँझ ५ बजेर ५५ मिनेटसम्म पनौतीमा जलसतह करिब साढे ४ मिटर पुगेको छ।

पानीको सतह निरन्तर बढ्दा तल्लो तटीय क्षेत्र र आसपासका बस्तीमा कटान तथा बाढीको जोखिम बढेको छ। रोशी खोलाको निगरानीका लागि पनौतीको भूमिडाँडा र त्रिवेणी घाट नजिक बाढी मापन केन्द्र राखिएका छन्। जलसतह खतराको तह नाघेपछि पनौतीको गोरखनाथमा स्थानीयले देख्ने गरी चेतावनी बत्ती बल्ने व्यवस्था छ।